ორგანიზაციის წარმომადგენლებმა არჩევნებამდე გამართულ სასწავლო-საინფორმაციო შეხვედრაზე, ცესკოს ბიულეტენის სისქესა და ბიულეტენის უკანა მხარეს, მარკერის კვალის პრობლემა დააფიქსირეს — ამის შესახებ სამართლიანი არჩევნებისა და დემოკრატიის საერთაშორისო საზოგადოების (ISFED) აღმასრულებელი დირექტორი, ნინო დოლიძე ამბობს.

როგორც დამკვირვებლები ამტკიცებენ, თითქმის ყველა შემთხვევაში, ბიულეტენის უკანა მხარეს გარჩევადი იყო, თუ რომელი პარტია გააფერადა ამომრჩეველმა.

გავრცელებულ ვიდეოში მთვლელ აპარატთან მიტანილი ბიულეტენის უკანა მხრიდან გაფერადებული ადგილი ჩანს.

ამასთან, დოლიძე ამბობს, რომ ორგანიზაციის თანამშრომლებმა აღნიშნულ პრობლემაზე ცესკოს წარმომადგენლისგან ინფორმაცია მიიღეს, რომ ეს ბიულეტენის "სატესტო ვერსია იყო".

"სასწავლო-საინფორმაციო შეხვედრაზე "სამართლიანი არჩევნების" წარმომადგენლებმაც დააფიქსირეს ბიულეტენის სისქის პრობლემა და მარკერის კვალი უკანამხარეს. ორგანიზაციის თანამშრომლებმა ცესკოს წარმომადგენლისგან მიიღეს ინფორმაცია, რომ ეს იყო ბიულეტენის სატესტო ვერსია და არჩევნებზე სხვა ქაღალდი იქნებოდა გამოყენებული", — წერს დოლიძე.