ბორჯომ-ბაკურიანის რკინიგზას და მის შემადგენელ ნაწილს, ე.წ. კუკუშკას, საქართველოს კულტურული მემკვიდრეობის დაცვის ეროვნული სააგენტოს დირექტორის, ნიკოლოზ ანთიძის, ბრძანებით კულტურული მემკვიდრეობის უძრავი ძეგლის სტატუსი მიენიჭა.

"ბორჯომ-ბაკურიანის სარკინიგზო კომპლექსი საქართველოს ისტორიის უმნიშვნელოვანესი შემადგენელი ნაწილია, რომელიც თავის თავში ასახავს მეოცე საუკუნის დასაწყისში საქართველოში განვითარებულ ინდუსტრიულ პროცესებს. გარდა ამისა, ერთ-ერთი პირველი და ამავე დროს ერთადერთი ვიწროლიანდაგიანი სარკინიგზო ხაზია საქართველოში, და ერთ-ერთი პირველი საინჟინრო-ტექნოლოგიური კომპლექსი, რომელიც დღემდე ფუნქციონირებს", - წერია საქართველოს კულტურული მემკვიდრეობის განცხადებაში.

თბომავალი ბორჯომ-ბაკურიანის რკინიგზის კომპლექსის შემადგენელი ნაწილია, რომლის მშენებლობა 1897 წელს დაიწყო და 1902 წელს ამოქმედდა. რკინიგზის ხაზი 37,2 კილომეტრის სიგრძისაა, ის იწყება ბორჯომის რკინიგზის სადგურზე და სრულდება დაბა ბაკურიანში.

საქართველოს კულტურული მემკვიდრეობის დაცვის სააგენტოს განცხადებით, კუკუშკა ინგლისიდან 1902 წელს სპეციალურად ჩამოიყვანეს:

"პორტერის ტიპის ორთქლმავალს ებმოდა ღია ტიპის ვაგონები, რომლებიც მხოლოდ მოაჯირით იყო შემორაგული. 1967 წელს რკინიგზამ ელექტროფიკაცია განიცადა, ამიტომ შეიცვალა ორთქლმავალიც და მისი ადგილი ელექტრომატარებელმა დაიკავა. ძველი კუკუშკა კი ბორჯომში სამუზეუმო ექსპონატად იქცა".

ორთქლმავალი დღეს, რკინიგზის სადგურის ბოლოში, ბორჯომიდან ბაკურიანისკენ მიმავალი გზის მარცხენა მხარეს დგას.