როგორც ჩანს, სოციალურად კონსერვატიული იაპონია არ ჩქარობს თავისი მეზობლების მსგავსად ერთნაირსქესიანთა ქორწინება აღიაროს, თუმცა წინ გადადგმული ნაბიჯია ისიც, რომ ქვეყანაში პირველი LGBTQ შოუ The Boyfriend გადაიღეს.

შოუში ცხრა ადამიანი მონაწილეობს, რომლებიც ერთ-ერთ სახლში, პლაჟთან ახლოს იწყებენ თანაცხოვრებას, რათა სიყვარული ან უბრალოდ მეგობარი იპოვონ. ერთი თვის განმავლობაში ისინი ერთად ცხოვრობენ და საკუთარი თავის უკეთ შეცნობას იწყებენ.

"ეს არაფრით განსხვავდება იმ ნაცნობი შოუებისგან, რომლებიც აქამდე გვინახავს. ერთადერთი, რაც საზოგადოებისთვის შესაძლოა უცნაური იყოს, ისაა, რომ ამ შოუში LGBTQ ადამიანები იღებენ მონაწილეობას და ეს იაპონიაში პირველი შემთხვევაა. თუმცა, ჩვენ არ გვქონია მიზანი, რაიმე განსაკუთრებული ჟანრი შეგვექმნა", — განუცხადა Variety-ს კასტინგის დირექტორმა ტაიკიმ.

აღსანიშნავია, რომ შოუში სექსუალური სცენები თითქმის არ გვხვდება, თუმცა ნათლად ჩანს ის სირთულეები, რომელთა გადალახვაც LGBTQ ადამიანებს უწევთ.

შოუს არაერთი დადებითი გამოხმაურება და რეცენზია მოჰყვა მსოფლიოს სხვადასხვა ცნობილ გაზეთიც.

"დაახლოებით ექვსი თვე დაგვჭირდა მონაწილეების შესარჩევად. მივიღეთ რეკომენდაციები მეგობრებისა და ნაცნობებისგან, განცხადებებს ვაქვეყნებდით სოციალურ მედიაშიც. მიუხედავად იმისა, რომ ეს პროცესი განსაკუთრებით რთული არ ყოფილა, ჩვენ საფუძვლიანი ინტერვიუები ჩავატარეთ ყველა მონაწილესთან, სანამ მათ შევარჩევდით", — განაცხადა ტაიკიმ.