როდესაც ძველ რომში არსებულ ცხოველებზე ფიქრობ, პირველი სურათი, რაც თვალწინ წარმოგიდგება ალბათ გლადიატორების ორთაბრძოლა იქნება . თუმცა, საინტერესოა, ამ დიდი კულტურის მქონე ხალხს ჰყავდათ თუ არა შინაური ცხოველები? და თუ ჰყავდათ, მაშინ რომლები?

ამ სტატიებში გაგაცნობთ იმ შინაურ ცხოველებს, რომლებსაც ძველი რომის არსებულ ოჯახებში შეხვდებოდით.

1. ძაღლები

ძველ რომში ძაღლებს რამდენიმე დანიშნულება ჰქონდათ, ერთ შემთხვევაში ისინი სანადირო ფუნქციას ასრულებდნენ, ასევე იყვნენ კარგი ჯაშუშები და დაჰყავდათ ყველგან, მათ შორის, ომებშიც. ის, რომ ძველ რომში ძაღლებს განსაკუთრებული როლი ჰქონდათ, პომპეის ეს ყველაზე ცნობილი მოზაიკაც მოწმობს, ისინი, რა თქმა უნდა, ხშირად იყვნენ ადამიანის საუკეთესო მეგობრის როლშიც.

2. კატები

რომში კატებს, ძირითადად, თაგვებისა და მავნებლების მოსაგერიებლად იყენებდნენ. აღსანიშნავია, რომ ქალაქებისა და ვილების გარდა, კატების ნაშთები სამხედრო ციხესიმაგრეებშიც იქნა აღმოჩენილი. კატები ჯარისკაცებისთვის მნიშვნელოვანი კომპანიონები იყვნენ, რადგან ისინი მათ საკვების შენარჩუნებაში ეხმარებოდნენ. დონალდ ენგელსის თქმით, ლათინური სიტყვა cattus კატის მნიშვნელობით პირველად სწორედ სამხედრო კონტექსტში გამოიყენეს.

მიუხედავად იმისა, რომ ძაღლებისგან განსხვავებით, კატების ეპიტაფიებს არ ვხვდებით, მათი ნახვა შესაძლოა საფლავის სტელაზე, სადაც წარმოდგენილები არიან როგორც ბავშვების თანამგზავრები და მეგობრები.

3. ჩიტები

რომაელი პოეტის, კატულუსის საყოველთაოდ ცნობილ ლექსებს თუ წავიკითხავთ, რომელიც თავის შეყვარებულსა და ბეღურაზეა, შესაძლოა მცდარი შთაბეჭდილება შეგვექმნას იმაზე, რომ ძველ რომში ფრინველები ძვირფას შინაურ ცხოველებად ითვლებოდნენ და ყველა ოჯახში ვხვდებოდით. ჩიტები მართლაც შინაურ ცხოველებად ითვლებოდნენ და საკმაოდ პოპულარულიც იყო, თუმცა უფრო მეტად მათ გარკვეული სიმბოლური დანიშნულება ჰქონდათ. ისეთი ფრინველები, როგორიცაა მშვენიერი მომღერალი ბულბული საკმაოდ ძვირი ღირდა და შესაძლოა მონის ფასისთვისაც კი მიეღწია.

როგორც ჩანს, ფრინველის გალიაც, როგორც არტეფაქტი, სწორედ რომაელების სახელს უკავშირდება. პლინიუსის თქმით, პირველი ადამიანი, ვინც გალია გამოიგონა, ასევე რომაელი იყო. მიუხედავად იმისა, რომ ამასთან დაკავშირებით არანაირი ფიზიკური მტკიცებულება არ შემორჩენილა, წერილობით წყაროებში მოხსენიებულია ვერცხლის, ოქროს, სპილოს ძვლისა და კუს ბაქნისგან დამზადებული გალიები.

4. მაიმუნები

არქეოლოგიური გათხრების შედეგად, ძველი რომის ტერიტორიაზე, ხმელთაშუა ზღვასთან აღმოჩენილია მაიმუნების ჩონჩხები. როგორც ჩანს, რომაელებში მაიმუნები პოპულარული შინაური ცხოველები იყვნენ. განსაკუთრებით უყვარდათ ე.წ მაკაკები, თუმცა სხვა სახეობების ჩონჩხებიც ადასტურებენ აღნიშნულს. აღმოჩენილი არტეფაქტებით დასტურდება, რომ მაიმუნები სოციალური მდგომარეობის მაჩვენებელი სულაც არ იყვნენ, როგორც ეს ჩიტების შემთხვევაში ხდებოდა.

5. თევზები

თუ სიტყვა "შინაური ცხოველის" მნიშვნელობას გავაფართოებთ, მაშინ უნდა ითქვას, რომ რომაელებს განსაკუთრებული დამოკიდებულება ჰქონდათ თევზების მიმართ. მხოლოდ პომპეიში 70-ზე მეტი წყლის აუზი იპოვეს, სადაც როგორც ჩანს, თევზები ჰყავდათ. მიუხედავად იმისა, რომ ისინი ფრინველებივით გარკვეულ სტატუს სიმბოლოს არ წარმოადგენდნენ, არსებობს არაერთი გადმოცემა, რომელიც გვიამბობს თუ როგორ წუხდნენ რომაელები, როდესაც მათი თევზი კვდებოდა. ხშირად ისინი თევზის გამოსახულებით ქმნიდნენ საყურეებსა და ყელსაბამებსაც კი, რომლებსაც დიდგვაროვანი ადამიანებიც ატარებდნენ.