თბილისის საქალაქო სასამართლოს მოსამართლის გიორგი გელაშვილის გადაწყვეტილებით, გენდერის ნიშნით განსაკუთრებული სისასტიკით ჩადენილი დანაშაულისთვის ოთარ ცინდელიანს უვადო პატიმრობა შეეფარდა.

სასამართლომ არ გაიზიარა დაცვის მხარის პოზიცია, რომ ცინდელიანს დანაშაული გენდერის ნიშნით არ ჩაუდენია. დაცვის მხარე განსაკუთრებული სისასტიკით ჩადენასაც გამორიცხავდა.

შეგახსენებთ, 21 წლის ქეთი ჯავახიშვილი 28 თებერვალს, ლილოში, სახლთან ახლოს მოკლეს.

მომხდართან დაკავშირებით მალევე დააკავეს მოკლულის შეყვარებული, ოთარ ცინდელიანი. ექსპერტიზის დასკვნით, ქეთი ჯავახიშვილს სხეულის თითქმის ყველა ორგანოზე 59 ჭრილობა ჰქონდა მიყენებული, ყველა მათგანი სიცოცხლის დროინდელი იყო.

დღევანდელ სასამართლო პროცესზე ბრალდებულმა პირველად დააფიქსირა პოზიცია და თქვა, რომ "ინანიებს".

ოთარ ცინდელიანს ბრალდება საქართველოს სისხლის სამართლის კოდექსის 109-ე მუხლის "თ" და "მ" ქვეპუნქტით (განზრახ მკვლელობა, ჩადენილი გენდერის ნიშნით, განსაკუთრებული სისასტიკით) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.