2022 წლის თებერვალში რუსეთ-უკრაინის ომის დაწყების შემდეგ კიევში პირველად ჩატარდა მოდის კვირეული.

კიევის მოდის კვირეულის ფარგლებში უკრაინული ბრენდის Andreas Moskin-ის ახალი კოლექციის ჩვენება მოეწყო, რომელიც ომში ტრავმირებულმა უკრაინელმა ჯარისკაცებმა გახსნეს — ისინი აუდიტორიის წინაშე პროთეზებით წარსდგნენ. მონაწილეთა შორის იყვნენ ჯარისკაცები არტემ მოროზი, მაქსიმ ერმოხინი, ნიკოლაი ლევკუნი, დიმიტრი ტერეშჩენკო და ალექსანდრე კუნგუროვი.

იმ მომენტში, როცა მაყურებელი მოდელების ამპლუაში მყოფ ჯარისკაცებს ტაშს უკრავდა, გავრცელდა ინფორმაცია, რომ რუსული სარაკეტო დარტყმის შედეგად ათობით ადამიანი დაიღუპა სამხედრო საწვრთნელ ობიექტსა და ახლომდებარე საავადმყოფოში, კიევის სამხრეთ-აღმოსავლეთით დაახლოებით 350 კილომეტრში.

ფოტო: Reuters

"ჩვენ გვინდოდა გვეჩვენებინა, რომ უკრაინული მოდა დღევანდელ საზოგადოებასთან ადაპტირდება, მასში მონაწილეობა მიიღეს ადამიანებმა, რომლებიც ომს გადაურჩნენ, მაგრამ კიდურები დაკარგეს. ჩვენ ვაჩვენეთ, რომ ადამიანებს ყველაფერი შეუძლიათ, კიდურების გარეშეც და ასეთ მდგომარეობაშიც შეიძლება იყო მოდური. მათ სჭირდებათ სიყვარული, პატივისცემა და იმის ჩვენება, რომ ისინი საზოგადოების განუყოფელ ნაწილს წარმოადგენენ."

ფოტო: Reuter

უკრაინის მოდის კვირეულის თანადამფუძნებელმა და აღმასრულებელმა დირექტორმა ირინა დანილევსკამ თქვა, რომ ოთხდღიანი ღონისძიება მიზნად ისახავს ადგილობრივი ინდუსტრიის მხარდაჭერას და ამასთან ერთად, მსოფლიოსთვის ომის სისასტიკის კიდევ ერთხელ შეხსენებას.

ფოტო: Reuters

"ჩვენ ვცდილობთ, რომ უკრაინის ხმა მუდმივად ისმოდეს მსოფლიოში, თუ ხალხი პოლიტიკოსებით დაიღალა, ან დანგრეული სახლებით და დაჭრილი ჯარისკაცებით, მაშინ ეს ინფორმაცია ახალ გზავნილს ატარებს. ეს არის გზავნილი იმის შესახებ, რომ ჩვენ ვართ ნიჭიერი ადამიანების ქვეყანა, რომლებიც მხოლოდ იმიტომ ნადგურდებიან, რომ უკაინელები არიან. ნუთუ არ უნდა დავეხმაროთ მათ?" — განაცხადა დანილევსკამ.