გარდაცვლილი კინოვარსკვლავის, ალენ დელონის, უკანასკნელ სურვილს შვილები არ შეასრულებენ; მსახიობს სურდა, რომ მისი 10 წლის ძაღლისთვის, სახელად ლუბოსთვის, ევთანაზია გაეკეთებინათ და სოფელ დუშში, საკუთარ სახლთან მდებარე სასაფლაოზე, მასთან ერთად დაემარხათ. თუმცა აქტივისტებმა ჯანმრთელი ცხოველის შესაძლო ევთანაზიის გამო შეშფოთება გამოთქვეს და განაცხადეს, რომ ძაღლს სხვა ოჯახში დააბინავებდნენ.

ბრიჯიტ ბარდოს ფონდის ინფორმაციით, დელონის ქალიშვილმა ანუჩკამ დაადასტურა, რომ ოჯახი ძაღლს ისევ მოუვლის.

"ანუჩკა დელონმა ახლახან დამირეკა და მითხრა, რომ ლუბო მისი ოჯახის წევრია და მათთან დარჩება. ძაღლს ევთანაზია არ გაუკეთდება", — განაცხადა ფონდის წარმომადგენელმა.

საფრანგეთში არ არსებობს კანონი, რომელიც ცხოველთა ევთანაზიას კრძალავს, თუმცა ეს ინდივიდუალური ვეტერინარის გადასაწყვეტია, განახორციელებს თუ არა მეპატრონის სურვილს.

დელონმა თავისი სახლის ტერიტორიაზე სამლოცველო ააშენა, სადაც სულ მცირე 35 ძაღლია დაკრძალული, ეს სახლი მსახიობმა 1970-იან წლებში შეიძინა.

ბელგიური მალინუა დელონმა 2014 წელს აიყვანა.

"ის ჩემი ბოლო ძაღლია. მე ის, როგორც ბავშვი, ისე მიყვარს და თუ მე მასზე ადრე მოვკვდები, ვეტერინარს ვთხოვ, რომ ერთად წაგვიყვანოს. ჩემს ხელებში დააძინებს. მირჩევნია, ეს ვქნა, ვიდრე ვიცოდე, რომ ის ჩემს საფლავზე ამხელა ტანჯვით მოკვდება." — თქვა დელონმა 2018 წელს Paris Match-ისთვის მიცემულ ინტერვიუში.