პოპის პრინცესის ცხოვრება მალე დიდ ეკრანზე გაცოცხლდება. ბრიტნი სპირსის ავტობიოგრაფიული წიგნის მიხედვით ფილმს იღებენ. დაძაბული აუქციონის შემდეგ, მუსიკოსის მემუარების ეკრანიზების უფლება კინოსტუდია Universal-მა მოიპოვა.

როგორც ცნობილია, ფილმის რეჟისორი Crazy Rich Asians-ის შემქმნელი ჯონ მ. ჩუ იქნება, პროექტის პროდიუსერის როლს კი ოსკარის ნომინანტი მარკ პლატი მოირგებს, რომელსაც ისეთ ცნობილ ფილმებზე უმუშავია, როგორიცაა La La Land. რამდენიმე დღის წინ სპირსმაც განაცხადა სოციალურ ქსელში, რომ პლატთან ერთად "საიდუმლო პროექტზე" მუშაობდა. ჩემი საყვარელი ფილმების შემქმნელიაო, დაამატა პოპვარსკვლავმა.

რადგან პროექტი ჯერ ადრეულ ეტაპზეა, უცნობია, ვინ ითამაშებს ბრიტნის როლს ფილმში. კინოსტუდიას არც სხვა დეტალები არ დაუზუსტებია, მაგრამ მედიაში გავრცელებული ცნობით, სპირსი ფილმზე მუშაობის პროცესში აქტიურად იქნება ჩართული.

ფოტო: Mario Anzuoni / Reuters

ბრიტნი სპირსის ავტობიოგრაფიული წიგნი, The Woman in Me ("ქალი ჩემში"), შარშან შემოდგომაზე გამოიცა და მაშინვე ბესტსელერი გახდა. იანვრის მონაცემებით, წიგნი უკვე ორ მილიონზე მეტ ეგზემპლარადაა გაყიდული და თარგმნილია 26 ენაზე.

მას შემდეგ, რაც პოპვარსკვლავი სასამართლომ მამის 13-წლიანი მეურვეობისგან გაათავისუფლა, ბრიტნის ავტობიოგრაფიული წიგნის გამოცემის უფლების მოსაპოვებლად რამდენიმე გამომცემლობა იბრძოდა. საბოლოოდ, ეს უფლება უპრეცედენტო კონტრაქტით, $15 მილიონის სანაცვლოდ ერგო Gallery Books-ს. გამომცემლის შეფასებით, ქალი ჩემში "გაბედული და გასაოცრად ამაღელვებელი ამბავია თავისუფლებაზე, პოპულარობაზე, დედობაზე, გადარჩენაზე, რწმენასა და იმედზე".

აღსანიშნავია, რომ წინათ ბრიტნი თავის ცხოვრებაზე ფილმის გადაღების წინააღმდეგი იყო.

ასევე იხილეთ:

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...