სულ ახლახან სერიალ დრაკონის სახლის (House of the Dragon) მეორე სეზონის ფინალური, მე-8 სერია ვიხილეთ. თუმცა, HBO-ის გახმაურებული ფენტეზი დრამის ერთგულ მაყურებელს ალბათ უკვე ერთი სული აქვს, როდის გაგრძელდება ტარგარიენების ამბავი. ამის შესახებ პროექტის ერთ-ერთმა შემქმნელმა, რაიან კონდელმა, ისაუბრა.

5 აგვისტოს გამართულ პრესკონფერენციაზე, კონდელმა გაამხილა, რომ დრაკონის სახლს კიდევ ორი სეზონი ექნება. ამასთან, ცნობილი გახდა, რომ სერიალის მე-3 სეზონზე მუშაობას 2025 წლის დასაწყისში შეუდგებიან. კონდელს ასევე ჰკითხეს, რამდენ ეპიზოდს გააერთიანებს მომდევნო სეზონები, მაგრამ ამაზე ზუსტი პასუხი არ გაცემულა.

"ეს HBO-სთან ჯერ არ განმიხილავს", — აღნიშნა რაიანმა, — "თუმცა, მოველი, რომ სერიალის დრამატული თხრობის ტემპი მეორე სეზონის მსგავსად გაგრძელდება".

დრაკონის სახლი HBO-ის პოპულარული სერიალის, სამეფო კარის თამაშების (Game of Thrones), წინაისტორიაა და მის მსგავსად ჯორჯ რ.რ. მარტინის წიგნებს ეფუძნება. სხვათა შორის, თავად მარტინიც ფიქრობდა, რომ სერიალი ოთხ სეზონს გასტანდა.

ფოტო: HBO

დრაკონის სახლში სიუჟეტი GOT-ში აღწერილ მოვლენებამდე 200 წლით ადრე იწყება და ტარგარიენების საგვარეულოს გარშემო ტრიალებს. დიდი მოლოდინის ფონზე, სერიალის პრემიერა 2022 წლის აგვისტოში შედგა. მის პირველ ეპიზოდს მსოფლიოში 10 მილიონზე მეტი მაყურებელი ჰყავდა, რაც HBO-ის ისტორიაში რეკორდული მაჩვენებელია. დრაკონის სახლი გახდა ოქროს გლობუსის მფლობელი საუკეთესო სატელევიზიო დრამის ნომინაციაში. სერიალი ცხრა ნომინაციაში იყო წარდგენილი ემის დაჯილდოებაზეც.

თუმცა, სანამ დრაკონის სახლის მომდევნო სეზონებს ველოდებით, მაინც არ მოვიწყენთ — მომავალ წელს GOT-ის კიდევ ერთ სპინ-ოფ სერიალს ვიხილავთ; შვიდი სამეფოს რაინდი (A Knight of the Seven Kingdoms) ასევე გახლავთ სამეფო კარის თამაშების წინაისტორია, რომელიც მარტინის ნოველების სერიას დაეფუძნება.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…