სულ მალე, პარიზში ოლიმპიური თამაშები დაიწყება. გათამაშება სტარტს 26 ივლისს აიღებს და 11 აგვისტოს დასრულდება. დღევანდელ სტატიაში ვეცდებით, გაგიზიაროთ დეტალები, რომლებიც Paris 24-ზე უნდა იცოდეთ.

ამ ოლიმპიადაზე რამდენიმე სიახლე გვექნება. წელს ჯამში 32 სახეობაში 329 ოქროს მედალი გათამაშდება. დებიუტანტი სახეობა ბრეიქდანსი იქნება, ხოლო სკეიტბორდს, სპორტულ ცოცვასა და სერფინგს უკვე მეორედ ვიხილავთ ოლიმპიურ თამაშებზე. გარდა ამისა, არ უნდა გამოგვრჩეს სპორტის ტრადიციულ სახეობები, რომლებიც ოლიმპიადისთვის ჩვეულებრივი მოვლენაა. მაგალითად, ძიუდო, ჭიდაობა, კალათბურთი, ძალოსნობა, ფეხბურთი და სხვა.

პარიზის ოლიმპიადაზე მონაწილეობას 206 ქვეყნის წარმომადგენელი, ჯამში დაახლოებით 10 500 სპორტსმენი მიიღებს. ზოგიერთ პატარა ქვეყანას, მაგალითად ანდორას, მხოლოდ ერთი წარმომადგენელი ჰყავს, ამის საპირწონედ ამერიკის შეერთებული შტატები 588 ათლეტითაა წარმოდგენილი. აღსანიშნავია, რომ 33 სპორტსმენი რუსეთიდან და ბელარუსიიდან მაინც მიიღებს მონაწილეობას, თუმცა მათ საერთაშორისო ოლიმპიური კომიტეტის გადაწყვეტილებით ქვეყნის დროშის ტარება არ შეეძლებათ და ინდივიდუალური, ნეიტრალური ათლეტების სახელით იქნებიან წარმოდგენილნი.

ცვლილებები გახსნით ცერემონიასაც შეეხება. წელს პირველად პროცესი ოლიმპიურ სტადიონზე არ გაიმართება. სანაცვლოდ, სპორტსმენები ნავებით, პატარა ფლოტილიით ჩამოივლიან მდინარე სენაზე. დაახლოებით 300 000-მდე ადამიანს შეეძლება სანახაობას ნაპირებიდან მიადევნოს თვალი.

მართალია, გათამაშებას პარიზის ოლიმპიური თამაშები ჰქვია, თუმცა პარიზის გარდა, სხვადასხვა სპორტის სახეობისთვის 35 ადგილი იქნება გამოყენებული. უმრავლესად პარიზის სიახლოვეს, მაგრამ ზოგიერთი მოშორებით, სხვა ქალაქებში და არამხოლოდ. მაგალითად, ლილი, ლიონი, ბორდო, ნიცა და სხვა. ამას გარდა, სერფინგი ტაიტიზე გაიმართება, რომელიც ფრანგული პოლინეზიის ნაწილია და მთავარი ღონისძიებებიდან 16 000 კილომეტრით იქნება დაშორებული.

სხვადასხვა გამოცემები ხშირად საუბრობენ იმაზეც, თუ რა უნდა აკეთო პარიზში ოლიმპიური თამაშების პარალელურად. ხაზს უსვამენ ქალაქის სილამაზეს, ცნობადობას, მის მეტსახელებს - სიყვარულის ქალაქი, სინათლის ქალაქი და ასე შემდეგ. ტრადიციულად, გვირჩევენ, რომ დავათვალიეროთ ლუვრი, სადაც შევძლებთ მონა ლიზას ხილვას, ვნახოთ ეიფელის კოშკი და პარიზის ღვთისმშობლის ტაძარი. მე პირადად სამხრეთ პარიზში, სენას მარცხენა სანაპიროზე, მონპარნასის მონახულებას გირჩევდით. იქ იხილავთ სასაფლაოს, სადაც დაკრძალულნი არიან ლეგენდარული პიროვნებები და ისეთი მწერლები, როგორებიც შარლ ბოდლერი, გი დე მოპასანი და ჟან-პოლ სარტრი არიან.

საქართველო პარიზის ოლიმპიადაზე

ჩვენი ქვეყანა დამოუკიდებელი ქვეყნის სტატუსით წელს ოლიმპიადაზე მერვედ იღებს მონაწილეობას.. საინტერესოა, რომ ისტორიაში პირველად ძიუდოში გუნდურ კატეგორიაშიც ვიასპარეზებთ. სულ ცოტა ხნის წინ ჩვენი ცნობილი გახდა სრული ჩამონათვალი იმ სპორტსმენებისა, რომლებიც პარიზის ოლიმპიადაზე იასპარეზებენ. წელს ჯამში 28 ათლეტი გვეყოლება. საქართველოს ოლიმპიური ნაკრების მთავარი მხარდამჭერი და სპონსორი საქართველოს ბანკია.

გთავზობთ ჩვენი ნაკრების შემადგენლობას 2024 წლის ოლიმპიური თამაშებისთვის:

საქართველოს ძიუდოს ნაკრები — გუნდური შეჯიბრი

ძიუდო

• გიორგი სარდალაშვილი
• ვაჟა მარგველაშვილი
• ლაშა შავდათუაშვილი
• ტატო გრიგალაშვილი
• ლაშა ბექაური
• ილია სულამანიძე
• გურამ თუშიშვილი
• ეთერ ლიპარტელიანი
• ეთერ ასკილაშვილი
• სოფიო სომხიშვილი

თავისუფალი ჭიდაობა

• გოდერძი ძებისაშვილი
• ვლადიმერ გამყრელიძე
• გივი მაჭარაშვილი
• გენო პეტრიაშვილი

ბერძნულ-რომაული ჭიდაობა

• რამაზ ზოიძე
• ლაშა გობაძე
• რობერტ კობლიაშვილი

ძალოსნობა

• შოთა მიშველიძე
• ირაკლი ჩხეიძე
• ლაშა ტალახაძე

კრივი

• ლაშა გურული
• გიორგი ყუშიტაშვილი

ცურვა

• ანა ნიჟარაძე
• ნოე ფანცხავა

მძელოსნობა

• ლიკა ხარჩილავა

ბატუტზე ხტომა

• ლუბა გოლოვინა

ფარიკაობა

• სანდრო ბაზაძე

ტყვიის სროლა

• ნინო სალუქვაძე