ყოველდღიური ვალდებულებები და საფიქრალი ხშირად გვაკარგვინებს იმის შეგრძნებას, რა გვინდა რეალურად და ვინ ვართ სინამდვილეში. თანაც, ამ ყველაფერს შიშების დაძლევა და გაბედვა სჭირდება, რაც სათქმელად უფრო მარტივი ამბავია ხოლმე, ვიდრე განსახორციელებლად. გაბედე, იცხოვრე შენი ცხოვრებით — ამ გზავნილით m²-მა ვიდეორგოლი გამოუშვა, რომლითაც კიდევ ერთხელ შეგვახსენა, რომ საკუთარ სურვილებს გასაქანი უნდა მივცეთ და აუცილებლად გავბედოთ ისე ცხოვრება, როგორც გვინდა.

ვიდეორგოლი m²-ის უკვე არსებული, გრძელვადიანი კამპანიის გაგრძელებაა. დეველოპერული კომპანის გზავნილი აქამდე იცხოვრე უკეთესად იყო, რომელიც ბრენდის მიდგომების გაფართოებასთან ერთად შეიცვალა ახალი შეტყობინებით — იცხოვრე შენი ცხოვრებით, რაც კომპანიის ფილოსოფიას კიდევ უფრო ზუსტად მოერგო. წელს ამ გზავნილს ახალი მოწოდება — გაბედე დაემატა.

განახლებულ სლოგანზე, კომპანიის ღირებულებებსა და იდენტობაზე ბრენდის განვითარების დეპარტამენტის ხელმძღვანელს, ირინა დუმბაძეს ვესაუბრეთ.

“სეგმენტი, რომლისთვისაც m² იქმნება, ყველაზე აქტიურ, შრომისმოყვარე და მაღალი პასუხისმგებლობის მქონე ადამიანებს აერთიანებს, თუმცა, როგორც კვლევამ აჩვენა, მათ უჭირთ, მოუსმინონ და ყურადღება დაუთმონ საკუთარ თავებს, იზრუნონ პირად სიამოვნებაზე. ეს, ერთი შეხედვით, თითქოს ადვილია, მაგრამ გასაბედად ძალიან რთული. ბევრი ადამიანი ვერ ბედავს, მიჰყვეს სურვილების რეალიზაციას და იცხოვროს საკუთარი ცხოვრებით. უარის თქმას, თანხმობას, ყველაფერს სჭირდება გაბედვა, რასაც ხშირად ხელს უშლის სიახლის მიღების და სტაბილურობის დაკარგვის შიში. სინამდვილეში გაბედვა ცვლის ყველაფერს და სწორედ აქედან იწყება საინტერესოც: მას შემდეგ, რაც ვბედავთ, ვიწყებთ საკუთარი ცხოვრებით ცხოვრებას, ჩვენი თავის მოსმენას და გამოვდივართ ჩარჩოებიდან.“ — გვიყვება ირინა დუმბაძე.

სწორედ ასე მივიდა m² განახლებულ გზავნილამდე: გაბედე — იცხოვრე შენი ცხოვრებით.

m²-ისთვის, როგორც ბრენდისთვის მნიშვნელოვანია, საზოგადოებასთან ერთად ვითარდებოდეს და ქმნიდეს ისეთ სივრცეებს, სადაც ადამიანები დაუახლოვდებიან საკუთარ თავს. სწორედ ამიტომ კომპანიის გზავნილებიც თვითრეალიზაციისკენ არის მიმართული და თავისუფლების იდეას ეფუძნება.

“ჩვენი მიზანია, არამხოლოდ პროდუქტით, არამედ ღირებულებებით და ფასეულობებითაც დავუკავშირდეთ მომხმარებლებს და ჩვენ შორის კავშირი დაეფუძნოს ემოციებს. ეს კამპანიაც ემოციურია და მიზნად ისახავს ადამიანების მოტივირებას, აკეთონ დიდი საქმეები, ან თუნდაც — პატარა, ეს მათზეა დამოკიდებული.“

კამპანიის ფარგლებში m²-მა სააგენტო მოზაიკასთან ითანამშრომლა და როგორც ირინა გვიყვება, თანამშრომლობა წარმატებული გამოდგა და მუშაობის პროცესი ძალიან საინტერესოდ წარიმართა

წამყვანი დეველოპერული კომპანიის, m²-ის მთავარი ღირებულებები თავისუფლება, ზრუნვაზე ფოკუსირება, ინოვაცია და მუდმივი განვითარებაა. ბრენდი ამ იდეების ერთგულებას მომავალშიც გააგრძელებს, ახალი გზავნილი კი — გაბედე, იცხოვრე შენი ცხოვრებით — ყველა პროექტის მთავარი სათქმელი იქნება