მართალია, დაბადების დღეს ყოველ წელს მოუთმენლად ველით, თუმცა მის მოახლოებას ხშირად დამატებითი ნერვიულობაც ახლავს — ერთი მხრივ, წნეხს ვგრძნობთ, რომ ეს დღე განსაკუთრებულად აღვნიშნოთ და კარგი დრო გავატაროთ, მეორე მხრივ, იმაზეც ვნერვიულობთ, ვინ შევიყვანოთ ჩვენი სტუმრების სიაში ისე, რომ ნაწყენი არავინ დარჩეს.

ვფიქრობთ დეკორაციებზე, ვარჩევთ ადგილს, ტორტს, თუმცა საბოლოოდ, იმის ნაცვლად, რომ გავერთოთ, დაბადების დღეს ყველა წვრილმანზე შფოთვაში ვატარებთ ან სულაც, წინასწარ ნერვიულობაში დრო ისე გვეპარება, რომ საერთოდ ვერაფრის დაგეგმვას ვასწრებთ. შეიძლება, საერთოდაც, წლებთან ერთად იმდენნაირი აღნიშვნა სცადე, რომ ყველაფერი მოგბეზრდა. სწორედ ამ პრობლემების თავიდან ასაცილებლად, ამ სტატიაში 10 იდეას მოგაწვდით, როგორ შეიძლება ეს დღე განსხვავებულად და დასამახსოვრებლად გაატარო.

1. წადი პიკნიკზე

თუ ამინდი ხელს გიწყობს, პიკნიკზე წასვლა შესანიშნავი აზრია! ბუნებაში საკმარისი დროის გატარებას ისედაც ვერ ვახერხებთ, ამიტომ დაბადების დღე არაფორმალურ გარემოში მეგობრებთან ერთად შეკრებისა და დროის სახალისოდ გატარებისთვის კარგი შანსია. თან ბადმინტონი, უნო ან ბანქო წაიღე, იქნებ, ბავშვობაში დაბრუნება და წრეში ბურთის გახსენებაც სცადო. თუ რომელიმე მეგობარს გიტარაც აღმოაჩნდა, მთლად უკეთესი! სასუსნავების მომარაგებაც არ დაგავიწყდეს.

2. თემატური წვეულება მოაწყვე

ბოლო პერიოდში თემატური წვეულების მოწყობა საქართველოშიც გახდა პოპულარული. ეს იმას ნიშნავს, რომ შეგიძლია, ერთგვარი დრესკოდი შეარჩიო, მაგალითად, შენი საყვარელი ფილმი, წიგნი, სერიალი, ეპოქა ან თუნდაც, ფერი დაასახელო და შენც და შენი სტუმრებიც ამ თემატიკის მიხედვით გამოეწყოთ.

3. ახალ ჰობის დაეუფლე

თითქოს, საკმარისი დრო არასოდეს გვაქვს იმისთვის, რომ ახალი რამე ვცადოთ და ის, რისი გაკეთებაც დიდი ხანია გვაინტერესებს, მართლაც ავითვისოთ. დაბადების დღე ამისთვის შესანიშნავი მიზეზია! შეგიძლია, თიხით ჭურჭლის გამოძერწვით დაინტერესდე, კედელზე ცოცვა სცადო, ჩოგბურთი ითამაშო, დახატო, ფაზლი ან კუბიკ-რუბიკი ააწყო. მსგავსი აქტივობები დაბადების დღეს უფრო მეტად დასამახსოვრებლად აქცევს!

4. გახდი ტურისტი საკუთარ ქალაქში

ხშირად საკმარისი დრო და რესურსი არ გვაქვს, რომ სამოგზაუროდ წავიდეთ, თუმცა ვინ თქვა, რომ იმ ადგილის დათვალიერებაც არ შეგვიძლია, სადაც ვცხოვრობთ? ალბათ, შენც შეამჩნევდი, რომ ხშირად საკუთარ ქალაქსა თუ სოფელს საკმარისად კარგად არ ვიცნობთ და შეიძლება, იქ წლებიც კი ისე გავატაროთ, რომ კონკრეტული უბანი, ქუჩა ან ღირსშესანიშნაობა ნანახიც კი არ გვქონდეს, ამიტომ დაბადების დღე ამის გამოსასწორებლად გამოიყენე, ახლო ადამიანებს ხელი მოკიდე და ახალ თავგადასავლებში გადაეშვი!

5. დაბადების დღის დაგეგმვა მეგობრებს მიანდე

თუ შენთვის ამ დღის დაგეგმვა განსაკუთრებით სტრესულია ან იდეები ამოგეწურა, ყველაფრის ორგანიზება მეგობრებს ანდე და საკუთარ დაბადების დღეზე სტუმარივით მიდი. დამიჯერე, ეს შფოთვას ერთიორად შეგიმცირებს და თანაც, საკუთარ თავს სიურპრიზსაც მოუწყობ! ასევე, არ დაგავიწყდეს, რომ ახლო ადამიანებს დაბადების დღის დაგეგმვასთან ერთად, შენთვის წერილების დაწერაც სთხოვო, რომელიც ამ მოგონებებს დიდხანს გაგახსენებს.

6. წადი მარტო დასასვენებლად

და ვინ თქვა, რომ ამ დღის აუცილებლად ახლობლებთან ერთად აღნიშვნაა საჭირო? ზოგჯერ, ერთადერთი, რაც გვჭირდება, ყველასგან და ყველაფრისგან მოწყვეტა და მარტო დარჩენაა. შეგიძლია, სადმე ახლოს, ქალაქგარეთ გახვიდე, ისეირნო, დაისვენო, ახალი კერძები დააგემოვნე, წიგნი წაიკითხო ან საყვარელ ფილმებს უყურო, შემდეგ კი დასვენებული, ახალი ძალებით დაბრუნდი.

7. გააჩუქე ყველა არასაჭირო ნივთი და მათ ნაცვლად, შენი თავი დაასაჩუქრე

ალბათ, სახლში ყველას გვაქვს ისეთი ნივთები ან ტანსაცმელი, რომელსაც დიდი ხანია აღარ ვიყენებთ, თუმცა ან გადასაგდებად გვენანება, ანდაც, მათ გადასადებად საკმარის დროს ვერ ვპოულობთ. შეგიძლია, დაბადების დღეზე ყველა არასაჭირო ნივთისგან გათავისუფლდე, მათი გაჩუქებით სხვებსაც გაახარებ და შენს ოთახში ახალი ნივთებისთვის ადგილიც გამოჩნდება! შენი თავის დასაჩუქრებაც არ დაგავიწყდეს. დაბადების დღეზე არამხოლოდ სხვებმა უნდა გაჩუქონ საჩუქარი, არამედ საკუთარი თავი შენც უნდა გაანებივრო, რადგან ამას ნამდვილად იმსახურებ.

8. ბავშვობაში დაბრუნდი და ატრაქციონების პარკს მიაშურე

თუ ექსტრემი გიზიდავს და ატრაქციონებიც შენი საყვარელი გასართობია, დაბადების დღეზე უკეთესს ვერაფერს იზამ. მეგობრებთან ერთად ეშმაკის ბორბლიდან ქალაქს გადმოხედე ან საშინელებათა ოთახში ფოტოების გადაღებით გაირთე თავი!

9. ჩაუწერე ვიდეომიმართვა შენს მომავალ თავს

იმისათვის, რომ კარგად გახსოვდეს, როგორ ჩაიარა ამ დღემ, როგორი იყო გასული წელი და რას ელოდები შემდეგში, შენს მომავალ თავს ვიდეო ჩაუწერე, სადაც ყველაფერს შეაჯამებ და შემდეგი წლის გეგმებსაც გაამხელ. ვიდეო შემდეგ დაბადების დღეზე ნახე. თუ წერა უფრო გიადვილდება, დაბადების დღის რეზოლუციების შედგენაზე დაფიქრდი!

10. გაატარე მთელი დღე საწოლში

საბოლოო ჯამში, არც იმის შეგრცხვეს თუ არაფრის ენერგია არ გაქვს და მთელი დღის საწოლში გატარება გირჩევნია. გვიანობამდე იძინე, საყვარელი საჭმელ-სასმელი და ტკბილეული მოიმარაგე და არ დაგავიწყდეს, რომ წელიწადში ერთი დღეა, რომელიც მხოლოდ შენია და ისე უნდა გაატარო, როგორც გენდომება.