დისნეის ერთ-ერთი პოპულარული სერიალი ჯადოქრები უეივერლიდან წლების შემდეგ ეკრანზე ბრუნდება! შოუს გულშემატკივრები წლებია, მსჯელობენ იმაზე, გადაიღებს თუ არა დისნეი სერიალის გაგრძელებას და აი, ისიც.

პროექტის აღმასრულებელი პროდიუსერები მსახიობები სელენა გომესი და დევიდ ჰენრი იქნებიან, რომლებიც ორიგინალ შოუში მთავარ როლებს ასრულებდნენ. Wizards of Waverly Place-ის გამოსვლის თარიღი ჯერჯერობით უცნობია.

გომესი და ჰენრი თავად სერიალშიც ითამაშებენ და კვლავ და-ძმის, ალექს და ჯასტინ რუსოს, როლებს მოირგებენ. სელენა საზოგადოებამ სწორედ ამ შოუთი გაიცნო. როგორც ცნობილია, სერიალში სხვა ძველ პერსონაჟებს ვერ ვნახავთ და ბევრი ახალი გმირი გამოჩნდება.

Wizards of Waverly Place-ის გაგრძელებაში სიუჟეტი ჯასტინ რუსოს გარშემო განვითარდება, რომელიც უკვე ზრდასრულია და ცოლ-შვილი ჰყავს. მან ჯადოქრობის უნარზე უარი თქვა და ჩვეულებრივი ადამიანივით ცხოვრება არჩია, თუმცა ის დილემის წინაშე აღმოჩნდება — ჯასტინს ახალგაზრდა ჯადოქარი მასწავლებლობას სთხოვს. ვნახოთ, როგორ განვითარდება მოვლენები.

ორიგინალი სერიალი ეთერში 2007-2012 წლებში გადიოდა და რუსოების ოჯახზე გვიყვებოდა. სელენა, მისი ძმები, ალექსი და მაქსი ჯადოქრები იყვნენ, დედა კი — ჩვეულებრივი ადამიანი. მამა მათ ჯადოქრობის ძალის კონტროლსა და სწორად გამოყენებას ასწავლიდა.

2009 წელს სერიალზე პირველი ფილმი გადაიღეს, 2013-ში კი საყვარელი პერსონაჟები მაყურებლებს ახალი პროექტით Alex Vs. Alex დაუბრუნდნენ.