რომის პაპმა ფრანცისკემ გასულ ოთხშაბათს ვატიკანში ქადაგებისას სექსუალური სიამოვნების შესახებ კომენტარი გააკეთა. რომის პაპის თქმით, სექსუალური სიამოვნება ღვთის საჩუქარია და ტაბუდადებული თემა არ უნდა იყოს.

"სექსუალური სიამოვნება ღვთის საჩუქარია, რომელსაც პორნოგრაფია ძირს უთხრის. ეს ურთიერთობის გარეშე დაკმაყოფილებაა, რაც დამოკიდებულების სხვადასხვა ფორმას იწვევს. წმინდა სიყვარული ორ ადამიანს შორისაა და სწორედ ამაშია სქესობრივი აქტის მშვენიერებაც", — განაცხადა რომის პაპმა.

რომის პაპმა კათოლიკეებს მოუწოდა, რომ პორნოგრაფიას თავი აარიდონ და სწორედ ეს წმინდა სიყვარული დაიცვან. ქადაგებაში რომის პაპმა ხაზი გაუსვა იმასაც, რომ მსგავს ვნებებთან ბრძოლა ადამიანის ცხოვრებაში მუდმივად მიმდინარეობს.

შეგახსენებთ, რომ რომის პაპს პორნოგრაფიის შესახებ აქამდეც არაერთხელ უსაუბრია. 2022 წლის ერთ-ერთი ქადაგების დროს რომის პაპმა ფრანცისკემ მღვდლები და მონაზვნები ინტერნეტში პორნოგრაფიის ყურების საშიშროების შესახებ გააფრთხილა. ქადაგებისას პაპმა ისიც აღნიშნა, რომ პორნოგრაფიის ყურება მანკიერებაა, რომლისგანაც თავის არიდება ხანდახან მღვდლებსაც და მონაზვნებსაც არ გამოსდით.