დუა ლიპამ Rolling Stone-თან მიცემულ ახალ ინტერვიუში ცნობილი ადამიანების მიმართ საზოგადოების დამოკიდებულებისა და პოლიტიკის შესახებაც ისაუბრა. ლიპა ფიქრობს, რომ საზოგადოებას არ სურს, პოპვარსკვლავები ჭკვიანები იყვნენ. მისი თქმით, ბევრად მეტ რამეს აკეთებს, ვიდრე მხოლოდ მომღერლობაა.

"მგონი, ადამიანებს არ სჯერათ, როცა ვამბობ, რომ წიგნების კითხვა მიყვარს. საზოგადოებას არ უნდა, რომ პოლიტიკურები და ჭკვიანები ვიყოთ. მე ბევრად მეტი ვარ, ვიდრე ჩემი საქმე. ჩემი ცხოვრება პოლიტიკურია, რადგან ლონდონში იმის გამო გავიზარდე, რომ ჩემმა მშობლებმა სამშობლო ომის გამო დატოვეს", — აღნიშნავს ლიპა.

დუა ლიპა, გარდა იმისა, რომ ცნობილი მომღერალი და პოპულარული სიმღერების ავტორია, წიგნების კლუბის დამაარსებელიცაა. ასევე, მან კულტურასთან დაკავშირებული ონლაინ ჟურნალი Service95, პოდკასტი Dua Lipa: At Your Service და მუსიკის ფესტივალი The Sunny Hill Festival შექმნა.

მომღერალი პოლიტიკური განცხადებების გაკეთებასაც არ უშინდება და ემიგრანტებთან დაკავშირებით დიდი ბრიტანეთის მთავრობის პოზიციას ეწინააღმდეგება. ამასთან, დუამ ხელი მოაწერა ღაზაში ცეცხლის შეწყვეტასთან დაკავშირებულ პეტიციას.

ალბანელი მომღერალი ამბობს, რომ ოჯახის გამოცდილების გამო, კარგად ესმის, რას ნიშნავს ომი. მართალია, დუა ლიპა ჰამასის ქმედებებს ეწინააღმდეგება, თუმცა მიაჩნია, რომ ღაზაში უამრავი უდანაშაულო ადამიანი კვდება, რაზეც პოლიტიკური ლიდერები უფრო ხშირად უნდა საუბრობდნენ.

"ამ მომენტში ვხედავთ, როგორ იხოცებიან უდანაშაულო ადამიანები. ჰუმანიტარულ კრიზისზე, რომელშიც ახლა ვიმყოფებით, მსოფლიოს ლიდერები საკმარისად არ საუბრობენ. აუცილებელია, რომ ღაზაში ცეცხლი შეწყდეს", — ამბობს ლიპა.

მომღერალი იმასაც ამბობს, რომ საჯაროდ თავისი პირადი ცხოვრების განხილვა არ სურს და საქმეზე ლაპარაკი ურჩევნია.

"აქ იმისთვის არ ვარ, რომ მეტი ყურადღება მივიქციო ან ახალ ამბებში მოვხვდე. ადამიანები ფიქრობენ, რომ სელებრითებს იცნობენ, თუმცა რეალურად მათზე წარმოდგენა არ აქვთ", — ამბობს ის.

დუა ლიპამ მის მესამე ალბომზეც ისაუბრა, რომლის გამოშვებასაც 2024 წელს გეგმავს. ეს პირველი პროექტი იქნება, რომელზეც მომღერალმა ახალ მენეჯმენტთან ერთად იმუშავა.

ლიპას თქმით, მან თავის სიმღერებზე საავტორო უფლებები შეისყიდა და ახალგაზრდა არტისტებსაც მოუწოდებს, ინდუსტრიაზე მეტი ცოდნა ჰქონდეთ და ყურადღებით იყვნენ, რათა თავი უკეთ დაიცვან.