Yandex Taxi-მ და Uber-მა საქართველოსა და დსთ-ის ქვეყნებში, აზერბაიჯანში, სომხეთში, რუსეთში, ბელორუსსა და ყაზახეთში ბიზნესი გააერთიანეს. ამის შესახებ ინფორმაციას იანდექს ტაქსის გენერალურ დირექტორზე, ტიგრან ხუდავერდიანზე დაყრდნობით, რუსული ტელევიზია დოჟდი ავრცელებს.

დოჟდის ცნობით, იანდექსმა და უბერმა ხელი მოაწერეს შეთანხმებას ახალი კომპანიის დაფუძნებაზე, რომლის განვითარებაშიც კომპანიები 325 მილიონ დოლარს ჩადებენ. იანდექსის წილი 100 მილიონი დოლარია, უბერის კი - 225 მილიონი. ახალ კომპანიას ხუდავერდიანი უხელმძღვანელებს.

ხუდავერდიანის წერილის თანახმად, კომპანიების გაერთიანებით მომხმარებლისთვის არაფერი შეიცვლება:

"მგზავრობის შესაკვეთად ორივე, იანდექს ტაქსისა და უბერის აპლიაკციები კვლავ იქნება ხელმისაწვდომი. მძღოლები კი გაერთიანდებიან ერთ პლატფორმაში."

წერილში, ასევე, საუბარია იანდექსისა და უბერის როუმინგის შეთანხმებაზე, რაც იმას ნიშნავს, რომ ლონდონში ჩასვლის შემთხვევაში იანდექსის აპილაკაციით უბერის გამოძახება იქნება შესაძლებელი, ხოლო უბერის აპლიკაციით - იანდექსის ტაქსის.

მოსკოვში დაფუძნებული ტაქსების უმსხვილესი კომპანია იანდექს ტაქსი საქართველოში 2016 წლის პირველი ივლისიდან ოპერირებს.

რაც შეეხება უბერს, ეს ამერიკული კომპანია მსოფლიოს 570 ქალაქში ოპერირებს, თუმცა მისი მობილური აპლიკაციები საქართველოში ხელმისაწვდომი არ არის.