8 წლის რომან ოლეკსევი, რომელმაც გასული წლის ივლისში უკრაინაზე რუსეთის სარაკეტო თავდასხმისას მძიმე დამწვრობები მიიღო, უკვე სკოლაში დაბრუნდა. უკრაინელი ბიჭის დამწვრობები სიცოცხლისთვის საშიში იყო და ასევე, თავის არეში ნამსხვრევებისგან ჭრილობებიც ჰქონდა მიღებული. მიუხედავად იმისა, რომ რომანის მდგომარეობა მძიმე იყო და იმედი არც ექიმებს ჰქონდათ, 8 წლის უკრაინელი ბიჭი უკვე გამოჯანმრთელების გზაზეა.

რომანი დედასთან ერთად ექიმის რიგში იყო, როცა 2022 წლის ივლისში რუსეთმა უკრაინის ქალაქ ვინიცაზე სარაკეტო თავდასხმა განახორციელა. რუსეთის უკრაინაში შეჭრის შემდეგ ეს ერთ-ერთი ყველაზე მძიმე თავდასხმა იყო, რომელსაც 20 ადამიანი, მათ შორის, 3 ბავშვი ემსხვერპლა.

"არ ვიცოდით, რომანი ისევ შეძლებდა თუ არა სიარულს, ან ხელისა და თითების ამოძრავებას. მაგრამ ექიმებისა და რომანის ზეადამიანური ძალისხმევის წყალობით, უკვე შესაძლებელია, რომ რომანი ცეკვასა და მუსიკალურ ინსტრუმენტებზე დაკვრას დაუბრუნდეს", — ამბობს რომანის მამა.

რომანი სკოლაში უკვე დაბრუნდა, დერეფნებში კი მისი შემჩნევა რთული არ არის, რადგან დამწვარ ადგილებზე ლურჯ სახვევებს ატარებს. რომანი ცეკვისა და მუსიკის წრეებზე სიარულსაც აგრძელებს, ახლახან კი ცეკვის კონკურსში პარტნიორთან ერთად ტანგო შეასრულა და მაყურებლის დიდი მოწონება დაიმსახურა.

ფოტო: Reuters

"ახლა რომანი მე-3 კლასშია, ჩვენ კი ყველაფერს ვაკეთებთ, რომ მდგომარეობა უკეთესობისკენ შეიცვალოს. სირთულეებს ნაბიჯ-ნაბიჯ გავუმკლავდებით და ყველაფერი კარგად იქნება", — ამბობს რომანის მამა, რომელმაც ასევე დასძინა, რომ შვილს მკურნალობა წლების განმავლობაში მოუწევს, ბოლო ეტაპზე კი თმის იმპლანტაცია და ყურის კორექციის ოპერაციაც დასჭირდება.