ბერძნული მითოლოგიისა და პერსი ჯექსონის წიგნების მოყვარულებისთვის ეს ზამთარი განსაკუთრებული იქნება, რადგან როგორც იქნა, მწერალ რიორდანის სამყაროზე სერიალს იღებენ! აქამდე შოუზე წარმოდგენას თიზერების მეშვეობით ვიქმნიდით, თუმცა ცოტა ხნის წინ დისნეიმ ოფიციალური ტრეილერი გაავრცელა.

პერსი ჯექსონის საგაში ჩვეულებრივი ამერიკული ცხოვრების სტილი ბერძნული მითოლოგიის სამყაროს ერწყმის, ყველაფერი კი იმით იწყება, რომ თინეიჯერ პერსის დედა გაუმხელს, რომ სინამდვილეში ნახევარღმერთია. პოსეიდონის შვილი, პერსი, ნახევარღმერთების ბანაკში მიდის, რის შემდეგაც მეგობრებთან, ანაბეთთან და გროუვერთან ერთად, ზევსის მოპარული მეხის საძებნელად დიდ მოგზაურობას იწყებს.

8 ეპიზოდისგან შემდგარ სერიალში პერსის როლს უოკერ სკობელი მოირგებს, ანაბეთისას — ლეა ჯეფრისი, გროუვერს კი არიან სიმჰადრი განასახიერებს. ამასთან, ზევსის როლში ლენს რედიკს ვნახავთ, პოსეიდონს კი ტობი სტივენსი ითამაშებს. აღსანიშნავია, რომ საპილოტე ეპიზოდის ერთ-ერთი სცენარისტი თავად წიგნების ავტორი რიკ რიორდანია.

ეს პერსი ჯექსონის წიგნების პირველი ეკრანიზაცია არაა — 2010 და 2013 წლებში ორი ფილმი გამოვიდა, რომელშიც მთავარ გმირს ლოგან ლერმანი განასახიერებს, თუმცა წიგნის ფანების დიდი ნაწილი ეკრანიზაციებით უკმაყოფილო დარჩა, ახლა კი სერიალს ინტერესით ელიან.

ხუთი წიგნისგან შემდგარი პერსი ჯექსონის სერიის გამოცემა რიორდანმა 2005 წელს დაიწყო. მსოფლიოში წიგნების 180 მილიონზე მეტი ეგზემპლარია გაყიდული. სერიის ხუთივე ნაწილი თარგმნილია ქართულადაც.

სერიალის პრემიერა Disney+-ის პლატფორმაზე 20 დეკემბერს შედგება. იხილეთ ტრეილერი: