კიბერუსაფრთხოების ექსპერტებმა 2023 წლის ყველაზე გავრცელებული პაროლები გამოავლინეს. მათ მიერ გასაჯაროებული სია თითქმის 2022 და 2021 წლის მონაცემების ანალოგიურია.

კვლევა NordPass-მა ჩაატარა, რომელიც სწორედ პაროლების კონტროლის სერვისია და VPN პროვაიდერის, NordVPN-ის, მიერაა შექმნილი. სპეციალისტებმა საჯაროდ ხელმისაწვდომ სხვადასხვა წყაროში 4.3 ტერაბაიტი მოცულობის მონაცემები გააანალიზეს და დაადგინეს, როგორია მიმდინარე წელს ყველაზე მეტი ადამიანის მიერ გამოყენებადი პაროლების ოცეული.

აი, მათი სიაც:

1. password
2. 123456
3. 123456789
4. guest
5. qwerty
6. 12345678
7. 111111
8. 12345
9. col123456
10. 123123
11. 1234567
12. 1234
13. 1234567890
14. 000000
15. 555555
16. 666666
17. 123321
18. 654321
19. 7777777
20. 123

ექსპერტებმა დაასკვნეს, რომ სტრიმინგ სერვისებით სარგებლობისთვის საჭირო ანგარიშების პაროლები უფრო სუსტია, ვიდრე ელექტრონული ფოსტის ან სოციალური ქსელების. ასევე, გამოვლინდა რეგიონული განსხვავებებიც, მაგალითად, ევროპაში ფეხბურთთან დაკავშირებული პაროლებია გავრცელებული. დიდ ბრიტანეთში ხშირად იყენებენ საფეხბურთო კლუბების აღმნიშვნელ შემდეგ სიტყვებს: "liverpool", "arsenal", "chelsea" და "rangers", როცა პორტუგალიაში პირველობას "benfica" იკავებს, იტალიაში კი — "juventus" და "napoli".

აღსანიშნავია, რომ:

• აშშ-ში ყველაზე გავრცელებულ პაროლებში 24-ე ადგილზე "fuckyou" არის, ხოლო 63-ზე — "cheese";
• ინდოეთში მეოთხე ადგილზეა სიტყვა "bigbasket”, რაც ქვეყანაში პოპულარულ ონლაინ მაღაზიას უნდა უკავშირდებოდეს;
• სამხრეთ აფრიკაში მე-20 ადგილზე "Sexy1234-ა";
• ბევრ ქვეყანაში სიაში მოწინავე ადგილს იკავებს "dragon", რისი მიზეზიც უცნობია.

NordPass-ის რეკომენდაციით, კიბერუსაფრთხოების უზრუნველსაყოფად სასურველია, პაროლი სულ მცირე 20 ერთეულისგან შედგებოდეს, რომელიც დიდ და პატარა ასოებს, ციფრებსა და სიმბოლოებს მოიცავს. ასევე, თავი უნდა შეიკავოთ ადვილად ამოსაცნობი კომბინაციებისგან, როგორიცაა დაბადების თარიღი, ადგილები, სახელები და გავრცელებული სიტყვები.