შვედური ავტომწარმოებელი, რომელიც ცნობილია მსოფლიოში ერთ-ერთი ყველაზე უსაფრთხო ავტომობილებით, წყვეტს ტრადიციული (შიდაწვის) ძრავის წარმოებას. კომპანიის განცხადებით, 2019 წლისთვის, მათ მიერ წარმოებულ ყველა ავტომობილს ელექტრონული ან ჰიბრიდული ძრავები ექნება. ამგვარად, 2019 წლის შემდეგ, მხოლოდ შიდა წვის ძრავის მქონე Volvo ბაზარზე აღარ გამოვა.

ვოლვოს გადაწყვეტილება, სრულად გადავიდეს ელექტრონულ ძრავებზე, მას Tesla-ს ყველაზე დიდ კონკურენტად აქცევს. ამ გადაწყვეტილების შესახებ მას შემდეგ გახდა ცნობილი, რაც 2 ივლისს Tesla-მ თავისი დაბალფასიანი და ფართო სეგმენტზე გათვლილი Model 3-ის პრეზენტაცია გამართა, რომლის გაყიდვებიც თვის ბოლოდან დაიწყება. ელონ მასკის განცხადებით, მხოლოდ დეკემბერში, კომპანიამ 200 ათასი Model 3-ის შეკვეთა მიიღო. ტესლამ თავისი არსებობის მცირე დროის მიუხედავად, მნიშვნელოვნად შეცვლა ძალთა ბალანსი აშშ-ს და მსოფლიო ავტო ბაზარზე, ტესლას საბაზრო ღირებულება ამჟამად $58 მილიარდია, რაც თითქმის ორჯერ მეტია, ვიდრე Ford-ის ღირებულება.

"ამ გადაწყვეტილებით იწყება ტრადიციული ძრავების დასასრული. ხალხის მოთხოვნა ელექტრონულ მანქანებზე სულ უფრო იზრდება და ჩვენ გვინდა ვუპასუხოთ ჩვენს ახლანდელ და მომავალ მყიდველებს", - აცხადებს ვოლვოს აღმასრულებელი დირექტორი ჰაკან სამუელსენი. 2025 წლისთვის ვოლვო ერთი მილიონი ელექტრონული ავტომობილის გაყიდვას გეგმავს.