ცოტა ხნის წინ უცხოურ მედიაში გავრცელდა ინფორმაცია, რომ 14-თვიანი ქორწინების შემდეგ ბრიტნი სპირსი და სემ ასგარი შორდებიან. მოგვიანებით, ასგარმაც დაადასტურა, რომ ბრიტნის შორდება და განქორწინებაც მოითხოვა. ბრიტნი სპირსი კი სემთან განქორწინებას ინსტაგრამის პოსტით გამოეხმაურა.

"ყველამ იცით, რომ მე და სემი ერთად აღარ ვართ. 6 წელი ურთიერთობისთვის ძალიან დიდი დროა, ასე რომ, ცოტა შოკში ვარ. პოსტს იმის ასახსნელად არ ვწერ, თუ რატომ მოხდა ასე, რადგან არავის საქმე არაა! თუმცა ტკივილს ვეღარ გავუძელი. სიამოვნებით გამოვხატავდი ჩემს ცრემლებსა და ემოციებს იმის შესახებ, თუ რას ვგრძნობ სინამდვილეში, მაგრამ რატომღაც ყოველთვის მიწევდა ჩემი სისუსტეების დამალვა. ადამიანი უპირობოდ უნდა გიყვარდეს და არა პირობებით. ასე რომ, იმდენად ძლიერი ვიქნები, რამდენადაც შემიძლია", — წერს ბრიტნი ინსტაგრამზე.

თებერვლიდან სხვადასხვა ჭორები ვრცელდებოდა იმის შესახებ, რომ ბრიტნისა და სემს ერთად თანაცხოვრებისას პრობლემები ჰქონდათ. გარდა ამისა, ფოტოებში ბრიტნი სპირსი და სემ ასგარი საქორწინო ბეჭდების გარეშეც დააფიქსირეს. ასგარის წარმომადგენლის განცხადებით კი, მსახიობმა ბეჭედი ფილმის გადაღებების გამო მოიხსნა

"6-წლიანი სიყვარულისა და ერთმანეთისადმი ერთგულების შემდეგ მე და ჩემმა ცოლმა ერთობლივად გადავწყვიტეთ, რომ ჩვენი ურთიერთობა დავასრულოთ. ჩვენ ვინარჩუნებთ სიყვარულსა და პატივისცემას ერთმანეთის მიმართ და მას ყოველთვის საუკეთესოს ვუსურვებ", — წერს სემი სოციალურ ქსელში.

შეგახსენებთ, რომ 5-წლიანი ურთიერთობის შემდეგ ბრიტნი სპირსი სემ ასგარზე 2021 წელს დაინიშნა. იმ პერიოდში, კი როცა ბრიტნი მამის მეურვეობისგან გათავისუფლებას ცდილობდა, სემი იყო ერთ-ერთი ადამიანი, რომელიც მას წლების განმავლობაში გვერდში ედგა. ბრიტნი სპირსმა, რომელიც 13 წელი მამის მეურვეობის ქვეშ იყო, ერთ-ერთ სასამართლო პროცესზე აღნიშნა, რომ შეყვარებულზე დაქორწინება და შვილების ყოლა უნდოდა, თუმცა ამის უფლებას არ აძლევდნენ. ბრიტნი სპირსი 13-წლიანი მეურვეობისგან 2021 ნოემბერში გათავისუფლდა.