ბოლო პერიოდში ხელოვნური ინტელექტის გარშემო ატეხილი ბუმის ფონზე Nvidia განსაკუთრებული ყურადღების ცენტრში მოექცა. რამდენიმე კვირის წინ კომპანიის საბაზრო კაპიტალიზაციამ ტრილიონ დოლარს მიაღწია, რის გამოც კომპანიასთან დაკავშირებით კიდევ უფრო დიდი ინტერესი გაჩნდა.

ბოლო ხუთი წლის ჭრილში ჩიპების მწარმოებელი კომპანიის შემოსავლები 22%-ით არის გაზრდილი. ამასთან, ანალიტიკოსების პროგნოზით, ეს მონაცემი მომდევნო სამ წელში დამატებით 24%-ით გაიზრდება.

ამის ფონზე, ცნობილი ხდება, რომ აშშ-ის ვაჭრობის დეპარტამენტი ზოგიერთ ქვეყანაში AI ჩიპების ექსპორტის შეზღუდვას განიხილავს, რამაც, შესაძლებელია, Nvidia-ს ჩინეთში გაყიდვებს პრობლემები შეუქმნას.

ეს პირველი შემთხვევა არ არის, როდესაც აშშ-ის მთავრობა ჩინეთში ჩიპების გაყიდვაზე კონტროლს ამკაცრებს. გასული წლის სექტემბერში პრეზიდენტის ადმინისტრაციამ დანერგა რეგულაციები, რომლის მიხედვითაც, ნახევარგამტარების მწარმოებელ გიგანტს სპეციალური ლიცენზიის მიღების გარეშე A100 და H100 ჩიპების ექსპორტი ჩინეთში აეკრძალა. იმ დროისთვის კომპანიის სავარაუდო დანაკარგი კვარტალში 400 მილიონი დოლარი იქნებოდა, თუმცა, Nvidia-მ გამოსავალი ნახა და სხვა კატეგორიის, ნაკლებად დახვეწილი A800 და H800 ტიპის ჩიპები შექმნა.

არსებული სიტუაციის შეფასებისას გასათვალისწინებელია, რომ ახლა კომპანია გაცილებით გაზრდილია, ვიდრე გასული წლის სექტემბერში იყო. ამასთან, ბოლო პერიოდში AI-ზე მოთხოვნამ საგრძნობლად მოიმატა, ხოლო მიწოდება ჯერ კიდევ ვერ აკმაყოფილებს მას.

Morgan Stanley-ის ანალიტიკოსი ჯოზეფ მურის შეფასებით, შესაძლებელია, რომ მოკლევადიან პერიოდში არსებულმა გადაწყვეტილებებმა უარყოფითი გავლენა მოახდინოს კომპანიის აქციების ფასებზე, თუმცა იქიდან გამომდინარე, რომ AI-ზე მოთხოვნა მკვეთრად მაღალი რჩება, ეს გავლენა "დიდ შეფერხებას" არ გამოიწვევს.

როგორც უკვე აღინიშნა, ბოლო წლებში Nvidia-ს აქციების ფასი საგრძნობლად გაიზარდა. არსებული მონაცემებით, კომპანიის ერთი აქციის ღირებულება 456,95 დოლარია, რაც მიმდინარე წლის დასაწყისთან შედარებით, 211%-ით არის გაზრდილი. ანალიტიკოსები ვარაუდობენ, რომ მომდევნო ერთ წელში კომპანიის ფასიანი ქაღალდების ღირებულება კიდევ გაიზრდება.

აქციებით ვაჭრობა ახლა უკვე საქართველოს ბანკის მობილბანკით არის შესაძლებელი. ესტუმრე მობილბანკს, რომლის საშუალებითაც ისეთი საერთაშორისო კომპანიების ფასიანი ქაღალდებით ვაჭრობას შეძლებ, როგორებიცაა: Apple, Amazon, Microsoft, Tesla, Google და სხვა. ეს სიახლე საქართველოს ბანკმა მისი ჯგუფის შვილობილი კომპანიის, Galt & Taggart-ისა და საერთაშორისო ფინანსური ტექნოლოგიების პლატფორმა DriveWealth-ის პარტნიორობით დანერგა. თუ გსურს მეტი გაიგო ინვესტიციების შესახებ, ესტუმრე ფეისბუქგვერდს — ინვესტიციები, სადაც გაიგებ მეტს, თუ როგორ ივაჭრო აქციებით.

ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე, როგორც მოგება. თქვენ დეტალურად უნდა გააანალიზოთ, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა გასწიოთ თანხის დაკარგვის რისკი.