19, 20 და 21 მაისს ლისი ლემანსის ტერიტორიაზე ფხიზლად გართობის ფესტივალი —YogaFest გაიმართება. 3 დღის განმავლობაში ფესტივალის მონაწილეები შეძლებენ დაესწრონ იოგას მრავალფეროვან პრაქტიკებს, ჩაერთონ სხვადასხვა გამაჯანსაღებელ და გასართობ აქტივობებში, მოისმინონ საინტერესო სპიკერების ლექციები და ისიამოვნონ ელექტრონული მუსიკით.

3 დღის განმავლობაში ფესტივალზე სტუმრები შეძლებენ დაკავდნენ ისეთი ფიზიკური აქტივობებით, როგორებიცაა იოგა დამწყებთათვის, Ჰათჰა იოგა, კუნდალინი იოგა, ძალისმიერი იოგა, ბავშვთა იოგა, მედიტაცია და ა.შ. ასევე, შესაძლებლობა ექნებათ განიტვირთონ ხატვით, თერაპიული ძერწვით, სამაგიდო თამაშებითა და სხვა მრავალფეროვანი გასართობი საშუალებებით. საღამოობით სტუმრებისთვის დაუკრავენ DJ არტისტები და მოეწყობა მუსიკალური ჯემი.

ფესტივალის მიზანი ცხოვრების ჯანსაღ წესზე ცნობიერების ამაღლება და "ფხიზელი გართობის" პოპულარიზაციაა, ამიტომ YogaFest-ზე ალკოჰოლის ან სხვა სათრობი სუბსტანციის მიღება დაშვებული არ არის.

საიდან გაჩნდა ფხიზლად გართობის იოგა ფესტივალის შექმნის იდეა? რა არის მისი მთავარი იდეა და რას სთავაზობს ის სტუმრებს? — ამ და სხვა თემებზე YogaFest-ის ერთ-ერთ ორგანიზატორი, დავით კანდელაკი დეტალურ ინფორმაციას გაგაცნობთ.

პირველ რიგში, მოგვიყევით როგორ გაჩნდა YogaFest-ის იდეა?

ყველაფერი 7 წლის წინ იოგა retreat-ით დაიწყო. ქალაქგარეთ გავედით, სუფთა ჰაერზე იოგასთან ერთად გავატარეთ დრო და შიმშილობით გაწმენდა შევასრულეთ. პირველ ჯერზე მხოლოდ 7 ადამიანი შემოგვიერთდა, მეორე წელს 17 ადამიანი შევიკრიბეთ, მესამეზე 70, მერე კი 150-საც ავცდით. იოგა retreat ამ ფორმით ყველას ძალიან მოეწონა. წლიდან წლამდე ის შიგნითვე იზრდებოდა და ვითარდებოდა. იოგასთან ერთად ცოცხალ მუსიკას ვუკრავდით, ვუსმენდით ელექტრონულ მუსიკას და ვცეკვავდით, რაც მთავარია, ფხიზლად. ასე დაიბადა YogaFest და ფხიზელი გართობა.

რატომ უნდა გავაკეთოთ არჩევანი ფხიზლად გართობაზე?

ალკოჰოლისა თუ სხვა სათრობი სუბსტანციების მიღებას არასასიამოვნო ნაბახუსევი მოსდევს. ჯანმრთელობის დაზიანების გარდა, ისინი დამოკიდებულებას იწვევს და გართობის მერე გუნება-განწყობილება ქვეითდება. ამას ფსიქოლოგიური პრობლემებიც მოჰყვება. აი, ფხიზელ გართობას კი უარყოფითი უკურეაქცია საერთოდ არ აქვს, პირიქით, გართობის მერე ხარ ჯანმრთელი, ენერგიული და სიცოცხლით სავსე. საყოველთაოდ მიღებულია, რომ თუ არ დათვერი, ვერ გაერთობი და ე.წ "კაიფს" ვერ დაიჭერ, რაც ძალიან მცდარი შეხედულება და პარადიგმაა. თუ ცდით, ნახავთ, რომ ფხიზლად გართობის ექსტაზი გაცილებით უფრო მასშტაბურია და არაა დამოკიდებული ნივთიერებაზე.

YogaFest-ზე იქნებიან სპიკერებიც. რა თემებზე ისაუბრებენ ისინი?

ჩვენი სპიკერები ძალიან საინტერესო და აქტუალურ საკითხებზე ისაუბრებენ. სტუმრებთან წარდგებიან ადიქტოლოგები ზაზა კალანდარიშვილი და ნუგზარ ძიძიგური. მათი თემებია —უკონტროლო და აკვიატებული ლტოლვა და ოჯახი და დამოკიდებულება. რეზი ხუნწელია ფხიზელ გართობასა და ელექტრონული მუსიკის ისტორიაზე მოგვიყვება, ლევან რამიშვილი — ფხაგავად გიტაზე, ხოლო ლევან ბახია მისივე საავტორო ლექციას წაიკითხავს ნებისწერის ფრაქტალზე.

იოგას სხვადასხვა პრაქტიკის გარდა, რა აქტივობებში შეეძლებათ სტუმრებს ჩართვა?

ფესტივალის აქტივობები მოიცავს სლეკლაინს, ბალანსის დაფას, ნეიროხატვას, სამაგიდო და უამრავ ფიზიკურ თამაშობებს. იქნება საბავშვო სივრცეც, სადაც ბავშვები დაესწრებიან საბავშვო იოგას და უამრავი თამაშით გაერთობიან. ფესტივალის ტერიტორიაზე იქნება ჯანსაღი კვების ობიექტები, ჰამაკები და ყველაფერი, რაც დასვენებისთვის, ვარჯიშისთვის და ფხიზლად გართობისთვისაა საჭირო.

როგორია ინტერესი YogaFest-ის მიმართ? რამდენად მოსწონთ სტუმრებს დროის ამ ფორმით გატარება?

ფესტივალის მიმართ ინტერესი წლიდან წლამდე იზრდება, განსაკუთრებით მედიის მხრიდან. როგორც წესი, ჩვენი ძირითადი სტუმრები იოგას მოყვარულები არიან, მაგრამ წელს ვფიქრობთ ის კიდევ უფრო მეტ ადამიანს დააინტერესებს, რადგან ელექტრონული მუსიკოსების საოცარი შემადგენლობა გვყავს.

რაც შეეხება მონაწილეების უკუკავშირს, ფესტივალზე დასწრების შემდეგ სტუმრები იჯერებენ, რომ ფხიზლად გართობა შესაძლებელია და ისეთივე ემოციებს იწვევს, როგორსაც არაფხიზელი მდგომარეობა. მეტიც, ბევრი სტუმარი უკვე ამჯობინებს ფხიზლად გართობას, რაც ძალიან გვახარებს.

YogaFest წელს 19, 20-სა და 21 მაისს, ლისი ლემანსის ტერიტორიაზე გაიმართება. დეტალური ინფორმაციის სანახავად გადადით ღონისძიების ბმულზე.