უცხოური მედიასაშუალებები წყაროებზე დაყრდნობით იტყობინებიან, რომ პოპულარული სტრიმინგ პლატფორმა HBO ჰარი პოტერის ახალ სერიალს გამოუშვებს.

წყაროების თქმით, ამ გადაწყვეტილებას კომპანია Warner Bros მალე ოფიციალურად გააჟღერებს. პროექტი კომპანიის ახალი სტრატეგიის ნაწილი იქნება, რომლის მიხედვითაც მაყურებლის საყვარელ ისტორიებსა და პერსონაჟებზე ახალ ფილმებსა და სერიალებს გადაიღებენ.

გავრცელებული ინფორმაციით, ჰარი პოტერის თითოეულ წიგნს სერიალის თითო სეზონი დაეთმობა. წყაროების მიხედვით, კომპანია მოლაპარაკებებს აწარმოებს წიგნის ავტორ ჯოან როულინგთანაც. კომპანიას უნდა, სერიალის შექმნაში როულინგიც იყოს ჩართული, რათა ნამუშევარმა პირველწყაროს — როულინგის წიგნებს მნიშვნელოვნად არ გადაუხვიოს.

აღსანიშნავია, რომ ჰარი პოტერისა და ჯადოსნური ცხოველების ფილმებზე წლების განმავლობაში სწორედ Warner Bros მუშაობდა.

რა თქმა უნდა, ჯერჯერობით სერიალის შინაარსსა და მსახიობებზე დეტალები ცნობილი არაა. ჰარი პოტერის ფანებს ისღა დაგვრჩენია, კომპანიების ოფიციალურ განცხადებებს დაველოდოთ და სხვა მნიშვნელოვან დეტალებზე მოგვიანებით ვიდარდოთ.