SOU 2017 წარმატებული და საინტერესო არტისტების საქართველოში ჩამოყვანას აგრძელებს.

ფესტივალის ფარგლებში ყველაზე მასშტაბური ღონისძიება ახლოვდება და ცხადია, მოწვეული არტისტის მიმართ ინტერესიც მატულობს.

ვინ არის რობერტ ჰენკე?

რობერტ ჰენკე გერმანელი აუდიო-ვიზუალური არტისტი, დაბ-ტექნო დუეტის — Monolake-ის წევრი და ბერლინისა და სტენფორდის უნივერსიტეტების ლექტორია, სადაც იგი კომპიუტერულ მუსიკას და მასთან დაკავშირებულ დისციპლინებს ასწავლის.

ამავე დროს, ჰენკე კომპანია Ableton-ის დამაარსებელი და მთავარი ინჟინერია. კომპანიის მიერ წარმოებული კომპიუტერული პლატფორმა თანამედროვე პროდიუსერების/DJ-ებისთვის მუსიკის შესაქმნელი ყველაზე პოპულარული პროგრამაა.

აუდიო-ვიზუალური ინსტალაციებისა და ელექტრონული მუსიკის დარგში რობერტ ჰენკე მსოფლიოში ერთ-ერთი ყველაზე წარმატებული არტისტია. მას ხშირად იწვევენ სხვადასხვა ქვეყნების ბოილერ რუმებსა და საკონცერტო დარბაზებში. ჰენკეს თაყვანისმცემლები საქართველოშიც მრავლად ჰყავს, რომლებიც მის ჩამოსვლას მოუთმენლად ელოდებიან.

რას შეასრულებს?

რობერტ ჰენკე ქართველი მაყურებლის წინაშე მისი ყველაზე ცნობილი და წარმატებული პროექტით, Lumière III-ით წარდგება.

Lumière III, რომლის პრემიერაც 2017 წელს შედგა, გრძელვადიანი საკონცერტო პროექტის მესამე ნაწილია. ეს ძლიერი, ეფექტური, მინიმალისტური, ნათელი, ხმაურიანი და პოეტური აუდიოვიზუალური ნამუშევარია, სადაც მრავალმხრივი ხმა და მაღალი სიზუსტის ლაზერული განათება ერთიანდება.

ექვს წელიწადზე მეტი ხნის განმავლობაში, ამ მედიუმის უნიკალური თავისებურებების სიღრმისეული ძიებისა და Lumière I-ის პრემიერიდან სამი წლის შემდეგ, მესამე ვერსია — Lumière III — მნიშვნელოვანი წინსვლის მაგალითია.

ალგორითმების წერა ჰენკეს შემოქმედებითი პრაქტიკის განუყოფელი ნაწილია, მაგრამ Lumière ლაზერის განათების მართვის აქამდე არარსებული, უნიკალური სტრუქტურის განვითარების უფრო სიღრმისეულ და ზუსტ დონეს აღწევს. ჰენკეს მიერ შექმნილ პროგრამაში ლაზერის განათება გამომსახველობით მუსიკალურ ინსტრუმენტებად იქცევა, რომელსაც უნიკალური თვისებები და სრულიად ახალი შესაძლებლობები გააჩნია.

სწრაფი და მოძრავი სარკეების საშუალებით სინათლით ხატვა მაღალტექნოლოგიურ კალიგრაფიას ქმნის და შედეგად მიღებული არტეფაქტის სიზუსტე ერთი ყოვლისმომცველი ტექნოლოგიის ორი ასპექტია. ბგერა და გამოსახულება ერთია, ერთიანი და აბსოლუტური მთლიანობა. Lumière III არის წარმოდგენა კონცერტისა და ვიზუალური ხელოვნების ზღვარზე. სახელწოდება Lumière ფრანგულად სინათლეს ნიშნავს, მაგრამ იმავდროულად, ადრეული ხანის კინემატოგრაფის პიონერებზე — ოგიუსტ და ლუი ლიუმიერებზეც მიანიშნებს.

როდის ჩამოდის და სად ჩატარდება?

რობერტ ჰენკე საქართველოში, ფილარმონიის დიდ საკონცერტო დარბაზში, 21 ივნისს დაუკრავს. კონცერტი 22:00-ზე დაიწყება. ბილეთების ფასი 10 ლარიდან იწყება და მისი შეძენა TKT.GE-ზე შეგიძლიათ.

შეგახსენებთ, რომ თანამედროვე მუსიკისა და ვიზუალური ხელოვნების საერთაშორისო ფესტივალი, SOU Festival 2017, 15 მაისს დაიწყო და 5 ივლისამდე გაგრძელდება. Sou Festival 2017 "Check in Georgia"-ს ფარგლებში იმართება.