ჰარი პოტერის ფილმებმა ალბათ ყველა ადამიანის ცხოვრება შეცვალა მთელს მსოფლიოში, თუმცა განსაკუთრებით მაინც — მათი, ვინც ჩვენთვის საყვარელ პერსონაჟებს ასახიერებდნენ. რუპერტ გრინტი, რომელიც ჟღალთმიანი რონ უისლის როლით გავიცანით, ახალ ინტერვიუში სწორედ იმ გავლენასა და ტრანსფორმაციაზე საუბრობს, რაც ამ ფილმებმა მის ცხოვრებაზე მოახდინა.

ფოტო: Warner Bros.

მსახიობის თქმით, ცნობადობასთან, რაც რონის განსახიერებამ მოუტანა, გამკლავება ყოველთვის ადვილი არ იყო: "ფილმის გადაღებები მთელი წელი გრძელდებოდა, მუშაობის დასრულებისთანავე კი ფილმის პიარ-კამპანიას ვიწყებდით. საერთოდ არ გვქონდა ამოსუნთქვის საშუალება."

რუპერტი 11 წლის იყო, როცა რონის როლი მიიღო და 22 წლის — როცა ფილმების გადაღება დასრულდა. მსახიობის თქმით, ჰარი პოტერის ბოლო ფილმზე მუშაობის შემდეგ, დარწმუნებული არ იყო, ისევ უნდოდა თუ არა სამსახიობო კარიერის გაგრძელება.

ფოტო: Warner Bros.

"შესვენება მჭირდებოდა, რომ ყველაფერზე მეფიქრა... ძალიან უცნაური იყო ეს შეგრძნება, თუმცა ვფიქრობ, შესაფერის დროს დავასრულეთ; რომ გაგვეგრძელებინა, შესაძლოა, ცუდად განვითარებულიყო მოვლენები."

მსახიობის თქმით, მადლიერია, რომ ამ ფილმებზე მუშაობის შესაძლებლობა მიეცა და ვინმემ რომ რონი დაუძახოს, აუცილებლად უპასუხებს : "ეს ჩემი მეორე სახელია."

ფოტო: Warner Bros.

რუპერტის თქმით, მან, დენიელმა და ემამ მართლაც საოცარი გამოცდილება მიიღეს, რისი რეალურად გაგება და გააზრება მხოლოდ მათ შეუძლიათ.

ფოტო: Warner Bros.