ყოველდღიური კალენდარი, რომლის თითოეული გვერდი საინტერესო, სასაცილო თუ უცნაურ ამბებს იტევდა, ალბათ ყველას გვახსოვს. წლებია მსგავსი კალენდრები სულ უფრო ნაკლებად გვხვდება. არადა, ეს შესანიშნავი გზაა ახალი ინფორმაციის აღმოსაჩენად თუ მოტივაციისა და კარგი განწყობის შესაქმნელად.

კალენდარს თიბისი დაზღვევის კამპანიებში ტრადიციულად მნიშვნელოვანი ადგილი უჭირავს და მიმართულია იმისკენ, რომ ადამიანებს შეახსენოს — სანერვიულო არაფერია.

თიბისი დაზღვევამ HOLMES&WATSON-თან ერთად 2023 წლის კალენდარიც შექმნა. 365 სხვადასხვა იდიომა თიბისი დაზღვევის კამპანიის, სანერვიულო არაფერიას შთაგონებით გაიხსენეს, შესაბამისი ილუსტრაციებიც დაამზადეს და ამ გზით მომხმარებლებს ნაკლები დარდისა და იმედიანი განწყობისკენ მოუწოდეს.

HOLMES&WATSON-ის უფროსი ქოფირაითერი, ჯუმბერ გამარჯობაშვილის თქმით, კალენდარზე მუშაობის პროცესი საკუთარი თავისთვის მოტივაციის მიცემა იყო, იმის შეხსენება, რომ სანერვიულო არაფერია.

"პრობლემებით, ვალდებულებებით, შესასრულებელი მიზნებითა და გადავიწყებული საქმეებით სავსე სამყაროში მიღებული ბრიფის საპასუხოდ, პირველ რიგში, საკუთარი თავისთვის უნდა აგვეხსნა, რომ სანერვიულო მართლა არაფერია. თავიდან არც ისე მარტივი იყო, მაგრამ შემდეგ იდიომა-იდიომა, ინსაით-ინსაით, სიტყვა-სიტყვა ნაშენებ კალენდარს ფორმა რომ მიეცა, მივხვდით, ეგრეა, არაფერია სანერვიულო და ამაში ყოველდღე შეგიძლია დარწმუნდე. თუ კალენდარი გაქვს", — ამბობს ჯუმბერ გამარჯობაშვილი და აღნიშნავს იმასაც, რომ "მართალია, ფიზიკური კალენდარი ყველას ვერ ექნება, მაგრამ ნურავინ ინერვიულებს, რადგან ისეთი ქვის მხეთქავი კალენდარი გამოგვივიდა, მისი თითოეული გვერდი შეიძლება ციფრულ მედიაში გამოჩუქურთმებული პოსტიც იყოს".

HOLMES&WATSON-ის კრეატიული დირექტორი, ნიკუშა ანთაძე აღნიშნავს, რომ ყოველდღიური კალენდარი ახალ იდეაზე მუშაობისას კრეატივის ტესტივით არის, რომელიც ახვედრებთ, ჩიტი ბრდღვნად ღირს თუ — არა.

"ყოველდღიურ კალენდარს ფიქრის პროცესში კრეატივის ტესტად ვიყენებთ — თუ იდეას 365 დღის სამყოფი სასაუბრო თემა მოჰყვება, ე.ი. ჩიტი ბრდღვნად ღირს. ამ მხრივ, სანერვიულო არაფერია, თავისი იდიომების კორიანტელით, ნამდვილი საბადო გამოდგა. წლებია, ასე მშვიდად არ ვყოფილვარ, როგორც ამ კალენდარზე მუშაობის პროცესში, რადგან ჩვენთვისაც აღმოჩენა იყო ამდენი სამოტივაციო, ინსპირაციული და ხალისიანი მიზეზის გამონახვა არსანერვიულოდ. შენც თუ გადაფურცლავ დღეში ერთხელ, ან სულაც ინსტაგრამზე დაემგზავრები, აუცილებლად დაგაზღვევს ნერვიულობისგან, რომელიც ბოლო დროს განსაკუთრებით უაზროდ და დიდი დოზით შემოგვეჩვია”, — ამბობს ნიკუშა ანთაძე.

არტ დირექტორი მარიამ საშა ამბობს, რომ 365 გვერდისთვის ინდივიდუალური ილუსტრაციის შექმნა საკმაოდ გამომწვევი დავალება იყო.

"შევეცადეთ მინიმალური და უშუალო ვიზუალით გამოგვესახა თითოეულის შინაარსი. ძალიან ვისიამოვნეთ პროცესით და ახლა უკვე დამთვალიერებლებსაც გაუხალისებს 2023 წელს", — აღნიშნავს მარიამ საშა.

ასე რომ, თუ მოტივაცია შემოგაკლდა, ცუდ განწყობაზე ხარ და მზრუნველი, სახალისო თუ დამაფიქრებელი იდიომებითა და ილუსტრაციებით ინსტაგრამ ფიდის გაფერადება გინდა, აუცილებლად უნდა გამოიწერო ინსტაგრამ გვერდი — სანერვიულო არაფერია და თვალი ადევნო 2023 წლის დღეების მსვლელობას ლამაზი ილუსტრაციებით გაფორმებულ იდიომებთან ერთად.