ახლახან მიშელ იოუმ პირველი ოქროს გლობუსი მიიღო ფილმისთვის Everything Everywhere All at Once და დაჯილდოების ცერემონიაზე სიტყვით გამოვიდა. შესაძლოა, ოქროს გლობუსის პროდიუსერებს მისი სიტყვის შემოკლება სურდათ, რადგან ჯერ კიდევ მიშელის საუბრის დროს მუსიკა ჩართეს. მიშელი არ დაბნეულა და იხუმრა: "მოკეტეთ! მე შემიძლია, გცემოთ! სერიოზულად!"

მიშელ იოუს უამრავ ისეთ ფილმში აქვს მონაწილეობა მიღებული, რომლისთვისაც საბრძოლო ხელოვნების დაუფლება დასჭირდა, მათ შორისაა, ფილმები Tomorrow Never Dies და Crouching Tiger, Hidden Dragon.

მიშელმა იუმორით ისაუბრა ჰოლივუდში მოღვაწეობის სირთულეებზე და აღნიშნა, რომ "ჰოლივუდში ჩასვლა ახდენილი ოცნება იყო, სანამ არ უთხრეს, რომ ის უმცირესობის წარმომადგენელი იყო."

ამის მიუხედავად, მიშელს საკუთარი ოცნებისთვის ბრძოლა არ შეუწყვეტია და უკვე 40 წელია, რაც კინოინდუსტრიაში მის სახელს ყველა იცნობს. მსახიობი ახლა 60 წლისაა და ბედნიერია, რომ შესაძლებლობა მიეცა ამ ასაკში, როცა ქალი მსახიობებისთვის შეთავაზებები იკლებს, ასეთი საინტერესო პერსონაჟი განესახიერებინა.

"საჩუქარი იყო ჩემთვის ამ ქალის როლის თამაში, რადგან სიღრმისეულად მესმოდა მისი, ისევე, როგორც უამრავი ადამიანს. რა სამყაროშიც არ უნდა ყოფილიყო ეს პერსონაჟი, საბოლოოდ, ის სიყვარულისა და ოჯახისთვის იბრძოდა."

ამავე თემაზე:

ზენდეიამ პირველი ოქროს გლობუსი მიიღო — ნახეთ ოქროს გლობუსი 2023-ის გამარჯვებულები