2 ივნისს, ჯანსუღ კახიძის სახელობის თბილისის მუსიკალურ-კულტურული ცენტრში, კვარტეტი რონდანე კონცერტს გამართავს. რონდანე მსოფლიოში ერთადერთი კვარტეტია, რომელიც ოთხი პიანისტისა და ოთხი როიალისგან შედგება.

SOU 2017-ის ფარგლებში კვარტეტი მეოცე საუკუნის ერთ-ერთი ყველაზე მნიშვნელოვანი ჰოლანდიელი კომპოზიტორის სიმეონ ტენ ჰოლტის საკულტო ნაწარმოებს Canto Ostinato-ს შეასრულებს. კონცერტზე დასწრების სურვილი იმდენად მაღალია, რომ ყველა ბილეთი უკვე გაყიდულია.

ფოტო: Unknow

რონდანე მსოფლიოში გამორჩეული პიანისტებისგან შემდგარი კვარტეტია, რომელიც ჰოლანდიელი კომპოზიტორის, სიმეონ ტენ ჰოლტის ნაწარმოებს ასრულებს. მათი ყოველი კონცერტი დაახლოებით 2 საათის განმავლობაში, უწყვეტად გრძელდება. ისინი ახლო ურთიერთობაში იმყოფებოდნენ თავად ტენ ჰოლტისთანაც, რომელმაც თავის ავტობიოგრაფიულ წიგნში კვარტეტის ერთ-ერთ წევრი, რობერტ ლამბერმონტი მისი მუსიკის საუკეთესო შემსრულებლად დაასახელა.

კვარტეტის რეპერტუარში ჰოლტის 5 ძირითადი ნაწარმოებია: Canto Ostinato (1979), Lemniscaat (1983), Horizon (1985), Incantatie IV (1990) და Meandres (1998). კომპოზიციები სექციებისგან შედგება და თავად პიანისტები ადგენენ მისი გამეორების სიხშირეს. რეპეტიციები დროს წარმოქმნილი ბევრი მუსიკალური იდეები სწორედ კონცერტების დროს სრულდება სრულყოფილად. 2010 წლისთვის მათ პირველ ორმაგ CD-ზე გამოსცეს ჰოლტის-ერთ-ერთი ყველაზე მნიშვნელოვანი ნაწარმოები Canto Ostinato. შემდეგ წელს კი ამას მოჰყვა Horizon-ისა და Lemniscaat-ის გამოშვება. 2015 წლის სექტემბერში მათ დაიწყეს ახალ ალბომზე (Incantatie IV) მუშაობა. კვარტეტი ასევე მონაწილეობს რამონ გიელინის ფილმში Over Canto, რომლის მსოფლიო პრემიერაც 2011 წელს, IDFA-ზე შედგა.

კვარტეტი რონდანეს კონცერტი ერთ-ერთია იმ 26 ღონისძიებას შორის, რომელიც ორი თვის განმავლობაში თანამედროვე მუსიკისა და ვიზუალური ხელოვნების ფესტივალის ფარგლებში ტარდება.

შეგახსენებთ, რომ თანამედროვე მუსიკისა და ვიზუალური ხელოვნების საერთაშორისო ფესტივალი, SOU Festival 2017, 15 მაისს დაიწყო და 5 ივლისამდე გაგრძელდება. Sou Festival 2017 "Check in Georgia"-ს ფარგლებში იმართება .