ოქტომბერი ის თვეა, როცა ავბედითი და პირქუში სიუჟეტის მქონე ფილმები თუ სერიალები ყველაზე სასიამოვნო საყურებელია. ვამპირები, მაქციები, ჯადოქრები — ჰელოუინამდე ეს არსებები ნამდვილი პოპვარსკვლავები ხდებიან.

გამონაკლისი არც წლევანდელი ოქტომბერია — სულ ცოტა ხნის წინ გამოვიდა ვამპირების აკადემიის სერიალი, 29 წლის შემდეგ მეორე ფილმით გაგრძელდა ჰოკუს ფოკუსი და ახლახან ვიხილეთ ინტერვიუ ვამპირთან. ამასობაში კი, AMC კიდევ ერთ სიურპრიზს გვიმზადებს. მაყურებელი მალე ახალ სერიალს, მეიფერის ჯადოქრებს, იხილავს. მისი პირველი ტრეილერი რამდენიმე დღის წინ გავრცელდა და დიდი გამოხმაურებაც გამოიწვია.

როგორც ტრეილერში იხილეთ, სერიალში მთავარ როლს ცნობილი ამერიკელი მსახიობი და მოდელი, ალექსანდრა დადარიო, ასრულებს. მეიფერის ჯადოქრების შემაძრწუნებელი ატმოსფერო კი ორწუთიან ვიდეოშიც იგრძნობა.

სერიალი ენ რაისის წიგნების სერიას ეფუძნება. ის სანფრანცისკოელ ნეიროქირურგ როუენ მეიფერზე მოგვითხრობს, რომელიც დედის გარდაცვალების შემდეგ ახალ ორლეანსში ოჯახის მშობლიურ სახლს უბრუნდება. როუენი სწორედ იქ იგებს, რომ იგი ძლევამოსილი ჯადოქრების შთამომავალია, მისი სახლი კი — მკვლელობებითა და გაუჩინარებებით განთქმული ადგილი.

ტრეილერმა ზოგს პოპულარული სერიალი, ამერიკული საშინელებათა ამბავიც (American Horror Story) კი მოაგონა. თუკი გავითვალისწინებთ, რომ AMC-ის ჰორორზე მუშაობის დიდი გამოცდილება აქვს (სხვა თუ არაფერი, მოსიარულე მკვდრები მათი შექმნილია), წინ ნამდვილად საინტერესო სანახაობა გველის.

სხვათა შორის, AMC-ის ნამუშევარია რაისის კიდევ ერთი წიგნების სერიის, ვამპირის ქრონიკების, ეკრანიზაცია (სერიალი), რომელიც მაყურებელმა ოქტომბრის დასაწყისში იხილა.

მეიფერის ჯადოქრების პრემიერა 2023 წლის 5 იანვარს შედგება.