2016 წლის შემოდგომაზე ახალ მზიურში თბილისის მერიამ კარიბჭე აღადგინა. როგორც პარკის ფეისბუკ გვერდი იტყობინება, რამდენიმე დღის წინ, მზიურის შესასვლელში მდებარე ძეგლი დააზიანეს.

"რამდენიმე დღის წინ, ღამე ცდილობდნენ ჩიტების და სხვა ცხოველების მოჭრას და მოპარვას. საბედნიეროდ, დაცვამ დროულად შეამჩნია და მოჭრილი ჩიტების წაღება ვერ მოასწრეს, თუმცა ძეგლი დაზიანებულია და დამნაშავე გაქცეული. გუშინ ისევ თხოვნით მივმართეთ მერიას და რამდენიმე დღეში ჩიტებს დაამაგრებენ ადგილზე" - წერს ახალი მზიური.

პარკის ადმინისტრაცია სინანულს გამოხატავს:

"გაკეთებულს აფუჭებენ, აზიანებენ და არ ფიქრობენ, იმაზე თუ რამდენი შრომაა ამ ყველაფრის გაკეთებისას ჩადებული".

შეგახსენებთ, რომ პარკში შინაგან საქმეთა სამინისტრომ კამერები რამდენიმე თვის წინ დაამონტაჟა, თუმცა, როგორც ახალი მზიურის ფეისბუკის გვერდიდან ირკვევა, აღნიშნულ მონაკვეთებზე დაფარვა არ აქვს.

ქანდაკებები მზიურის შესასვლელში 1990-იანი წლებიდან არის. ახალი მზიურის ინფორმაციით, როდესაც პროექტ “ახალ მზიურზე” დაიწყო მუშაობა, მათ პირველად მაშინ მიმართეს წერილობითი თხოვნით ქალაქ თბილისის მერიას, აღედგინა აღნიშნული ძეგლი.