House of the Dragon-ის მსახიობის, პედი კონსოდაინის თქმით, ჯორჯ მარტინმა მეფე ვისერის ტარგარიენის როლის შესრულება მოუწონა. მეფე ვისერისი უკვე House of the Dragon-ის 8 ეპიზოდში ვიხილეთ და სიუჟეტი დიდწილად სწორედ ამ პერსონაჟის ირგვლივ ვითარდება.

"შენი ვისერისი უკეთესია, ვიდრე ჩემი — ასეთი შეტყობინება მივიღე ჯორჯ მარიტინისგან. ნდობისთვის კი, რა თქმა უნდა, მადლობა გადავუხადე", — ამბობს პედი კონსოდაინი.

ჯორჯ მარტინმა პედი კონსოდაინის შესრულების მიმართ სიმპათიები ამ შეტყობინებამდეც არაერთხელ გამოხატა. სერიალის პრემიერამდე ტვიტერზე გავრცელებულ ვიდეოში ჯორჯ მარტინმა ვისერისის როლის შესახებ ისაუბრა.

ფოტო: HBO

"მეფე ვისერის ტარგარიენი, რომელსაც შოუში პედი კონსოდაინი განასახიერებს, იმაზე უკეთესად არის წარმოდგენილი, ვიდრე Fire & Blood-ში ჩემ მიერ აღწერილი მეფე ვისერისი. ის უფრო ძლიერია, ჯერ კიდევ კონფლიქტებშია ჩართული, მაგრამ უფრო ტრაგიკული პერსონაჟია. მაქვს იმის გამბედაობა ვაღიარო, რომ მსახიობმა ვისერისის პერსონაჟი შოუში უფრო საინტერესო გახადა", — ამბობს ჯორჯ მარტინი.

პედი კონსოდაინმა GQ-თან ინტერვიუში ვისერისის პერსონაჟი დაიცვა, რომელსაც სერიალის ფანები სუსტ მეფეს ხშირად ეძახიან. "იმის თქმა, რომ ვისერისი სუსტი მეფეა, ჩემი აზრით, სისულელეა. ის უბრალოდ ზედმეტად თანამგრძნობია, არ არის ძალაუფლებით შეპყრობილი და მშვიდობა სურს. დიქტატორი ან ტირანი რომ ყოფილიყო, ეს იქნებოდა დამაკმაყოფილებელი? არა, ის ასეთი არ არის", — ამბობს ვისერისის როლის შემსრულებელი, პედი კონსოდაინი.

შეგახსენებთ, რომ House of the Dragon ისევ გრძელდება და პირველი სეზონის დასრულებამდე კიდევ ორი ახალი ეპიზოდი დარჩა.