შესაძლებელია უდაბნოში თოვლის შექმნა? როგორც ჩანს, კი, რადგან საუდის არაბეთი 2029 წლის აზიის ზამთრის თამაშებს (AWG) უმასპინძლებს.

თამაშები გაიმართება 500 მილიარდი აშშ დოლარის ღირებულების მშენებარე მეგაქალაქ ნეომში, რომელიც მთელი წლის განმავლობაში ზამთრის სპორტული კომპლექსით იამაყებს.

"საუდის არაბეთის უდაბნოები და მთები მალე სათამაშო მოედანი გახდება ზამთრის სპორტისთვის", — აღნიშნა აზიის ოლიმპიურმა საბჭომ (OCA) განცხადებაში თამაშის მასპინძლად სამეფოს არჩევის გადაწყვეტილებაზე.

ნეომი იქნება პირველი დასავლეთ აზიის ქალაქი, რომელიც უმასპინძლებს ამ პოპულარულ ღონისძიებას.

თამაშები დაგეგმილია ქალაქის უბანში, სახელად ტროჟენაში, "სადაც ზამთრის ტემპერატურა ნულ ცელსიუსზე ქვემოთ ეცემა და მთელი წლის ტემპერატურა, ზოგადად, 10 გრადუსით დაბალია, ვიდრე დანარჩენ რეგიონში", — ნათქვამია პროექტის ვებსაიტზე.

ტროჟენას მშენებლობა 2026 წელს დასრულდება და ეს ტერიტორია მთელი წლის განმავლობაში იქნება სათხილამურო, სააგარაკო, სასახლეების, ძვირადღირებული სასტუმროებისა და, რაც ყველაზე შთამბეჭდავია, ადამიანის მიერ შექმნილი მტკნარი წყლის ტბის სახლი.

ტროჟენა არის ნეომის 10 რეგიონიდან ერთ-ერთი, მაგრამ, სამწუხაროდ, მდებარეობს ისეთ მხარეში, სადაც ნალექი ძალიან ცოტაა, რაც შეიძლება პრობლემატური გახდეს თამაშებისთვის. თუმცა ამას ხელი არ შეუშლია საუდის არაბეთის ლიდერებისთვის ამ ტერიტორიისადმი დიდი იმედების დამყარებაში. მემკვიდრე პრინც მუჰამედ ბინ სალმანმა, რომელიც ასევე ნეომის საბჭოს თავმჯდომარეა, თქვა, რომ ის "ხელახლა განსაზღვრავს სამთო ტურიზმს მსოფლიოსთვის ეკოტურიზმის პრინციპებზე დაფუძნებული ადგილის შექმნით, რაც ხაზს უსვამს ჩვენს ძალისხმევას ბუნების შესანარჩუნებლად და საზოგადოების ცხოვრების ხარისხის გაუმჯობესებისთვის".

არქიტექტორები და დეველოპერები ბევრს ფიქრობდნენ ადგილის პროგრესსა და მდგრადობაზე. ისინი გეგმავენ, ადგილს შემოარტყან ნაკრძალი, რათა შეინარჩუნონ მისი ბუნებრივი ატრიბუტები.

ფილიპ გულეტმა, ტროჟენას აღმასრულებელმა დირექტორმა, თქვა, რომ მისი გუნდი უახლოვდება განვითარების ახალ მოდელს, ითვალისწინებს რა მის გარშემო არსებული ფლორისა და ფაუნის ღირებულებას. "ჭრით ახალ გზას ამ გარემოში და არასდროს შეაკეთებთ მას", — განმარტა მან.

მშენებლობის გარდა, ბევრი ადამიანი აღფრთოვანებულია იმით, რომ საუდის არაბეთი მასპინძლობს ზამთრის თამაშებს. ალპურმა მოთხილამურე ფაიიკ აბდიმ OCA-ს მიერ გავრცელებულ განცხადებაში აღნიშნა, რომ ბავშვობაში არასოდეს სჯეროდა, თუკი სამშობლოში თხილამურებით სრიალს შეძლებდა.

იმის გათვალისწინებით, თუ რამდენად ცხელია ფაიიკ აბდის სამშობლო, მისი გაკვირვება ბუნებრივია. თუმცა ტექნოლოგია იმდენად დაიხვეწა, რომ ისეთი დაუჯერებელი ოცნებებიც კი ხდება, როგორიც უდაბნოში საკმარისი თოვლის შექმნაა ზამთრის თამაშების ჩასატარებლად. ნუთუ ეს გასაოცარი არ არის?