ცნობილი სერიალი Criminal Minds ("კრიმინალური აზროვნება") მალე ახალი სეზონით დაბრუნდება. დიდი ხნის განმავლობაში პროექტის ბედი გაურკვეველი იყო — 2021 წელს კი, სერიალში მონაწილე მსახიობმა, პეიჯეტ ბრიუსტერმა, განაცხადა, რომ, მისი აზრით, სერიალი დამთავრდა.

თუმცა, ბევრი გულშემატკივრის გასახარად, ბრიუსტერი შეცდა. მეტიც — იგი ერთ-ერთია სერიალის თავდაპირველი სამსახიობო გუნდიდან, რომელსაც ახალ სეზონში ვიხილავთ. მსახიობთან ერთად, პროექტში დაბრუნდნენ ჯო მანტენია, კირსტენ ვანგსნესი, ადამ როდრიგესი, ა.ჯ. ქუკი და აიშა ტაილერი. ამასთან, განახლებული სერიალის აღმასრულებელი პროდიუსერი კვლავაც ერიკა მესერი იქნება.

მანტენიამ, რომელიც კრიმინალურ აზროვნებას მესამე სეზონზე შეუერთდა და FBI-ის აგენტი დევიდ როსი განასახიერა, ტვიტერზე ნახევრად აგებული გადასაღები მოედნიდან ფოტოც გამოაქვეყნა და სერიალის სახელის ჰეშტეგი დაურთო.

კრიმინალური აზროვნების პირველი სეზონი 2005 წელს გამოვიდა. 15 სეზონის განმავლობაში, სერიალმა უამრავი ერთგული მაყურებელი შეიძინა, რის გამოც ორჯერ პროექტის ეგრეთ წოდებული სპინ-ოფიც გადაიღეს. ამის მიუხედავად, ბოლო სეზონებში მაყურებელთა რიცხვმა იკლო, რაც სერიალის დასრულების ერთ-ერთ მიზეზადაც განიხილებოდა.

თუმცა, სერიალის დასრულების შემდეგ, გავრცელდა ხმები, რომ მისი დაბრუნება იგეგმებოდა. დაიმედებული მაყურებლის მოლოდინები არ გამართლდა, ამიტომ, ბრიუსტერსაც ვერ გავამტყუნებთ. მაგრამ, რადგან, საბოლოოდ, მაინც გადაწყდა პროექტის განახლება, საინტერესო ამბებს უნდა ველოდოთ.