უკვე რამდენიმე დღეა, ამბერ ჰერდისა და ჯონი დეპის სასამართლო პროცესიდან ამოჭრილი მოკლე ვიდეოები TikTok-ზე ვირუსულად ვრცელდება. ამბერ ჰერდის ჩვენებიდან ამოჭრილ მოკლე ვიდეოებს, რომლებშიც მსახიობს დასცინიან, მილიონობით ნახვა აქვს.

ერთ-ერთმა ასეთმა მოკლე ვიდეომ 5 დღეში 30 მილიონზე მეტი ნახვა დააგროვა. ვიდეოში ამბერ ჰერდი ძალადობის შესახებ ემოციურად ჰყვება, რასაც თან ახლავს მოსამართლის ფორმაში გამოწყობილი კიმ კარდაშიანი, რომელსაც "განაჩენი გამოაქვს".

კიდევ ერთ ვირუსულ ვიდეოში ტიკტოკის მომხმარებელი ამბერ ჰერდს ჰბაძავს და ძალადობის შესახებ ემოციურად ჰყვება. ამ ვიდეოსაც უკვე 10 მილიონზე მეტი ნახვა აქვს და მომხმარებლები ამბერ ჰერდის დაცინვას არ ერიდებიან.

TikTok-ის ოფიციალურ განცხადებაში ნათქვამია, რომ ამბერ ჰერდის შესახებ რამდენიმე ვიდეო უკვე წაშალეს, რომელიც პლატფორმის წესებს ეწინააღმდეგებოდა და ეს პროცესი ისევ გრძელდება.

"ტიკტოკი კრძალავს ისეთი შინაარსის მქონე ვიდეოებს, რომლებშიც ძალადობრივი ტრაგედიის მსხვერპლს შეურაცხყოფას აყენებენ. გარდა ამისა, ტიკტოკის პოლიტიკის შესაბამისად, ჩვენ ვშლით შეურაცხმყოფელ ვიდეოებს, მათ შორის მუქარასა და დამამცირებელ განცხადებებს, რომლებიც ინდივიდის დაცინვას, შერცხვენას, დაშინებას ან ზიანის მიყენებას ემსახურება", — ვკითხულობთ ტიკტოკის განცხადებაში.

ფოტო: AP

მიუხედავად ასეთი განცხადებისა, ამ ეტაპზე ტიკტოკზე ისევ ბევრი ვიდეო რჩება, რომლებშიც ამბერ ჰერდის სასამართლოზე მიცემულ ჩვენებას დასცინიან. შეგახსენებთ, რომ გასულ კვირას ამბერ ჰერმა სასამართლო პროცესზე ნაფიც მსაჯულებს რამდენიმე შემთხვევის შესახებ უამბო, როდესაც ჯონი დეპმა მასზე ფიზიკურად იძალადა.

"ჩემთვის საშინელებაა კვირების განმავლობაში აქ ჯდომა და ამ ყველაფრის გამეორება. ეს ყველაზე მტკივნეული და რთული რამაა, რაც ოდესმე გამომივლია", — განაცხადა ამბერ ჰერდმა სასამართლო პროცესზე.