ოსკარის დაჯილდოებაზე უილ სმიტმა კრის როკს სახეში გაარტყა, რის შესახებაც საზოგადოების შეფასება ორ ნაწილად იყო. კომიკოსმა და მსახიობმა კრის როკმა ოსკარის ცერემონიაზე ჯეიდა პინკეტ სმიტის გადაპარსულ თავზე იხუმრა, პასუხად კი ჯეიდას ქმარმა, მსახიობმა უილ სმიტმა, კრის როკს სახეში გაარტყა. მართალია, საზოგადოების დიდი ნაწილი უილ სმიტის საქციელს აკრიტიკებს და თავად მსახიობმა ბოდიშიც უკვე მოიხადა, თუმცა მას დამცველებიც გამოუჩნდნენ.

კომიკოსმა ტიფანი ჰადიშმა ოსკარის ცერემონიაზე უილ სმიტის ქმედება გაამართლა. კომიკოსის თქმით, ცოლზე ხუმრობის შემდეგ უილ სმიტის რეაქცია ყველაზე მშვენიერი რამ იყო, რაც ცხოვრებაში აქამდე უნახავს.

ფოტო: Getty Images

"როცა დავინახე, რომ შავკანიანმა კაცმა ცოლს მხარი დაუჭირა, ეს ჩემთვის ძალიან ბევრს ნიშნავდა. როცა კონკრეტულ მომენტში ქალი თავს დაუცველად გრძნობს და შემდეგი სიტყვები ესმის: "ჩემი ცოლის სახელი აღარ ახსენო, თავი დაანებე", — ეს ზუსტად ის არის, რაც ქმარმა უნდა გააკეთოს. ქმარმა უნდა დაგიცვას და ეს ჩემთვის ძალიან მნიშვნელოვანია", — ამბობს ჰადიში.

ჰადიში, რომელიც 2022 წლის ოსკარის დაჯილდოების სცენაზე თავადაც წარსდგა და სმიტების ოჯახთან მეგობრობს, კრის როკისთვის სახეში დარტყმას ამართლებს. "შესაძლოა, ბევრ ადამიანს უილის საქციელი არ მოეწონა, მაგრამ ჩემთვის ეს ყველაზე ლამაზი რამ იყო, რაც კი ოდესმე მინახავს. ამ ემოციამ დამაჯერა, რომ კიდევ არიან კაცები, რომლებსაც თავიანთი ცოლები უყვართ და მათზე ზრუნავენ", — დასძინა ჰადიშმა.

ფოტო: Getty Images

შეგახსენებთ, რომ უილ სმიტმა კრის როკსა და კინოაკადემიას ბოდიში საჯაროდ უკვე მოუხადა. "მინდა, ბოდიში საჯაროდ მოგიხადო, კრის. ზღვარს გადავედი და არასწორად მოვიქეცი. ძალიან მრცხვენია. ჩემი ქმედება არ შეესაბამება იმ კაცისას, რომელიც მინდა, რომ ვიყო. სიყვარულისა და სიკეთის სამყაროში ძალადობის ადგილი არაა", — წერს უილ სმიტი კრის როკს.

კრის როკმა უილ სმიტის წინააღმდეგ საქმის აღძვრაზე უარი უკვე განაცხადა. თუმცა აღსანიშნავია, რომ როკს პოლიციისთვის მიმართვა 6 თვის განმავლობაში შეუძლია. ასეთ შემთხვევაში უილ სმიტს 6 თვემდე თავისუფლების აღკვეთა და $100 000-მდე ჯარიმა ემუქრება.