პრიცმა ჰარიმ საზოგადოებას მოუწოდა, რომ აივტესტირება აუცილებლად გაიარონ და "თავიანთი სტატუსი იცოდნენ". სასექსის ჰერცოგი იმედოვნებს, რომ დედის სამუშაოს წარმატებით გააგრძელებს და ამ ვირუსის ირგვლივ არსებულ არასწორ წარმოდგენებს აღმოფხვრის.

პრინცი ჰარი უელსის მორაგბეთა ნაკრების ყოფილ კაპიტან გარეტ ტომასს ესაუბრა, რომელსაც აივ ინფექციის დიაგნოზი დაუსვეს. პრინცის თქმით, ამ საკითხის მიმართ ადამიანების დამოკიდებულება მნიშვნელოვნად შეიცვალა მას შემდეგ, რაც 35 წლის წინ პრინცესა დაიანამ ლონდონის ერთ-ერთ საავადმყოფოში აივ ინფექციის სამკურნალო პირველი განყოფილება გახსნა: ახლა ადამიანები უფრო ღიად ლაპარაკობენ ამ თემაზე.

ფოტო: Getty Images

"ვფიქრობ, რომ დედაჩემის სამუშაო დაუმთავრებელია და თავს ვალდებულად ვთვლი, რომ მისი საქმე გავაგრძელო. თუმცა ვაღიარებ, რომ დედაჩემს ვერასდროს შევცვლი, რომელმაც შიდსთან დაკავშირებით ბევრი რამ შეცვალა საზოგადოების ცნობიერებაში და საკმაოდ ხმაურიანად იბრძოდა კიდეც", — განაცხადა პრინცმა ჰარიმ.

პრინცმა ჰარიმ აივტესტირება 2016 წელს ერთ-ერთი ვებგვერდის პირდაპირ ეთერში ჩაიტარა, რამაც ქვეყანაში ტესტირების მოთხოვნა 500%-ით გაზარდა.

"თითოეული ჩვენგანი ვალდებულია, რომ აივტესტირება გაიაროს. აუცილებელია, ჩვენი სტატუსი ვიცოდეთ, რათა სხვა ადამიანები დავიცვათ", — განაცხადა პრინცმა ჰარიმ და თან აღნიშნა, რომ პანდემიის დროს აივტესტირების რაოდენობა შემცირდა. მისი აზრით, როგორც COVID-19-ის ტესტირება ტარდება, ასევე რეგულარულად უნდა ხდებოდეს აივ ინფექციის სტატუსის დადგენა.