ცოტა ხნის წინ ჰონგ-კონგში კორონავირუსის დელტა შტამის რამდენიმე შემთხვევა დაფიქსირდა. ინფიცირებულთაგან ერთ-ერთი ზოომაღაზიის თანამშრომელი აღმოჩნდა, სადაც ზაზუნებსა და სხვა მცირე ზომის ცხოველებს ყიდიან. ტესტის ჩატარების შემდეგ ამ ზოომაღაზიაში ვირუსი 11 ზაზუნას დაუდასტურდა, რის შემდეგაც მთავრობამ 2 000-მდე ზაზუნისა და სხვა მცირე ზომის ცხოველის დაძინების გადაწყვეტილება მიიღო.

ოფიციალური ინფორმაციის მიხედვით, აღნიშნული შესაძლოა ვირუსის ცხოველიდან ადამიანზე გადაცემის შემთხვევა იყოს. მთავრობის განმარტებით, "პრევენციული მიზნებისთვის" 34 ზოომაღაზიასა თუ დაწესებულებაში მცხოვრებ ცხოველებს დააძინებენ.

აღსანიშნავია ისიც, რომ ამ რიცხვში შედიან ის ზაზუნებიც, რომლებიც მოქალაქეებმა ზოომაღაზია Little Boss-ში 22 დეკემრის შემდეგ შეიძინეს. მათ ცხოველები შესაბამის პირებს უნდა ჩააბარონ, რის შემდეგაც უკვე აყვანილ ზაზუნებსაც დააძინებენ.

გადაწყვეტილებას უამრავი მოწინააღმდეგე გამოუჩნდა. მოქალაქეებმა პეტიციაც შექმნეს, რომელსაც უკვე 14 ათასი ხელმომწერი ჰყავს.

"შინაური ცხოველი პატრონის საუკეთესო მეგობარია და მთავრობის გადაწყვეტილების გამო ათასობით ადამიანი უძვირფასეს თანამგზავრებს დაკარგავენ", — ვკითხულობთ პეტიციაში.