Adidas სრულიად ინოვაციური ფეხსაცმელების წარმოებას იწყებს. ამისათვის კომპანია 3D პრინტერის ტექნოლოგიას გამოიყენებს. სპორტული ტანისამოსის გლობალურმა ბრენდმა წარსულში უკვე გამოუშვა ინოვაციური ტექნოლოგიით დამზადებული ფეხსაცმელები, თუმცა ლიმიტირებული რაოდენობით. ამჯერად კი, ადიდასი ახალი მეთოდით დამზადებული ფეხსაცმელების მასობრივ წარმოებას გეგმავს.

ფეხსაცმლის ახალი მოდელის სახელი Futurecraft 4D იქნება, რომელსაც კომპანია Carbon დაამზადებს. Carbon 3D პრინტერის უახლესი ტექნიკის, Digital Light Synthesis-ის შემქმნელია, რომელიც ნივთებს მინიმუმ 25-ჯერ და მაქსიმუმ 100-ჯერ უფრო სწრაფად ამზადებს, ვიდრე ეს აქამდე ხდებოდა.

ფოტო: Adidas

ფოტო: Spotify

ამ ტექნიკის გამოყენება, ადიდასის აზრით, კომპანიას წარმოების აბსოლუტურად განსხვავებულ მასშტაბზე გადაიყვანს.

ახალ ფეხსაცმელს წინა მოდელებისგან განსხვავებული, უფრო მსუბუქი, დრეკადი და თხელი ძირი ექნება.

გასული წლის ბოლოს ადიდასმა ამ ტექნიკით დამზადებული პირველი ფეხსაცმელი გამოუშვა, თუმცა მცირე რაოდენობით. ამჟამად კომპანია პირველ ეტაპზე 300 წყვილის დამზადებას გეგმავს. შემოდგომისთვის წარმოება 5 ათას წყვილამდე გაიზრდება და ბაზარზეც ოფიციალურად გამოჩნდება.

ცხადია, ეს საბოლოო რაოდენობა არ იქნება. კომპანიის თქმით, Futurecraft 4D-ს წარმოება ეტაპობრივად გაიზრდება და მისი რაოდენობა 2018 წლის ბოლოსთვის 100 ათას წყვილს მიაღწევს.