ჰოლივუდის ვარსკვლავი, ამერიკელების ყველაზე საყვარელი მსახიობი ჯულია რობერტსი სტუმრად ტელეკომპანია CBS-ის დილის გადაცემაში იყო, სადაც ოჯახზე, კარიერასა და ჰოლივუდზე ისაუბრა.

მსახიობი იხსენებს, რომ როცა ფილმ ლამაზმანისთვის ოსკარის ნომინაცია მიიღო მაშინ გააცნობიერა, რომ საინტერესო კარიერა ჰქონდა, იხსენებს იმასაც, თუ როგორ გაიცნო 2001 წელს ფილმ მექსიკელის გადაღებების დროს მისი მეუღლე დენი მოდერი.

"ის და ბრედი [ბრედ პიტი] ძალიან ახლო მეგობრები არიან, გადაღებების დროს კი ხშირად საუბრობდნენ ლიტერატურაზე, მუსიკაზე, კინოზე და ა.შ. დენი თავიდანვე მომეწონა და რამდენჯერაც საშუალება მომეცემოდა, და ამ ორს ერთად ვხედავდი, მივდიოდი და გამოლაპარაკებას ვცდილობდი. მომიტყუებია, რომ რაღაც წიგნი წაკითხული მაქვს. ის ჩემი ყველაზე ახლო მეგობარია", - ამბობს ჯულია.

ფოტო: AP

ჯულიამ ასაკზეც ისაუბრა და თქვა, რომ საერთოდ არ არის აუცილებელი ყოველთვის იდეალურად გამოიყურებოდე.

"50 წლის ვხდები, ერთნაირად ვარ ბედნიერიც და სევდიანიც, მაგრამ ამაში, რა თქმა უნდა, ტრაგედიას ვერ ვხედავ. სახლში მაქვს სარკე და ხანდახან როცა შიგნით ვიყურები, ვხვდები, რომ არ არის აუცილებელი ყოველთვის იდეალურად გამოიყურებოდე", - ამბობს ჯულია.