დრეიკი გრემი 2022-ის ორ ნომინაციას საკუთარი სურვილით გამოეთიშა, თუმცა ამის მიზეზი არ დაუსახელებია.

35 წლის მომღერალმა მის ხელმძღვანელობასთან მოლაპარაკების შემდეგ გრემი 2022-ის ორ ნომინაციაზე — საუკეთესო რეპალბომი Certified Lover Boy-ისთვის და საუკეთესო რეპშესრულება მისი სიმღერისთვის Way 2 Sexyუარი თქვა.

ეს პირველი შემთხვევა არ არის, როცა დრეიკმა ნომინაციაზე უარი განაცხადა. 2018 წელს დრეიკმა თავისი ალბომი More Life არ წარადგინა, რადგან იმედგაცრუებული იყო იმ ფაქტით, რომ 2017 წლის საუკეთესო რეპსიმღერად მისი Hotline Bling დასახელდა, მიუხედავად იმისა, რომ ის რეპის ელემენტებით არ ხასიათდებოდა.

ფოტო: Getty Images

"ეს შეიძლება იმიტომ ხდება, რომ წარსულში რეპის შემსრულებელი ვიყავი, ან იმიტომ, რომ შავკანიანი ვარ", — განაცხადა დრეიკმა, რომელიც ფიქრობს, რომ ჯილდოს განაწილებას რასობრივი საფუძველი აქვს.

"რეპის კატეგორიაში პრიზების გადმოცემით მიზანმიმართულად ცდილობენ, რომ ადგილი მომიჩინონ, რადგან ეს ერთადერთი მიმართულებაა, რომელიც ჩემთვის შესაფერისად მიაჩნიათ", — დასძინა მან.

გრემის აკადემიის დამოკიდებულება შავკანიანი მომღერლების მიმართ პროტესტისა და იმედგაცრუების მიზეზი ბევრჯერ გამხდარა. კანადელმა მომღერალმა The Weeknd-მა 2020 წელს გრემის აკადემიის შესახებ დაპოსტა, რომ ის "მუდმივად კორუმპირებული იქნება". გრემი 2019-ზე დრეიკმა რეპის კატეგორიაში სიმღერით God’s Plan გაიმარჯვა. მომღერალმა სიმღერის შესრულებაზე უარი განაცხადა და მისი გამოსვლა აკადემიის კრიტიკას დაუთმო, მაგრამ სიტყვა მანამდე შეაწყვეტინეს, სანამ აზრს დაასრულებდა და ახალი ნომინაცია გამოაცხადეს.

ფოტო: Getty Images

2021 წლის მარტში The Weeknd-მა პირობა დადო, რომ ცერემონიას მუდმივ ბოიკოტს გამოუცხადებდა და გრემზე მის სიმღერებს აღარ წარადგენდა. ამის მიზეზი კი "საიდუმლო კომიტეტის" მიერ ნომინანტების არჩევა იყო. 2021 წლის ცერემონიის შემდეგ გრემის აკადემიის აღმასრულებელმა დირექტორმა განაცხადა, რომ ნომინანტების არჩევა "საიდუმლოდ" აღარ მოხდებოდა, რაც წლების განმავლობაში საბოლოო სიებს განსაზღვრავდა.

შეგახსენებთ, რომ ცოტა ხნის წინ გრემი 2022-ის კანდიდატების ვინაობა ცნობილი გახდა. ნომინაციებში ჯასტინ ბიბერი, Doja Cat, H.E.R, ოლივია როდრიგო და ბილი აილიში ლიდერობენ.