მსახიობების შემოქმედებით ცხოვრებაში არსებობს გარდამტეხი მომენტები და როლები, რომელთა შემდეგაც მათ მაყურებელთა ფართო წრე იცნობს. თუმცა, აქამდე მათ ხშირად გრძელი გზა აქვთ გამოვლილი — იმდენად გრძელი, რომ ფანების ნაწილმა შეიძლება არც კი იცოდეს, როდის დაიწყო თავიანთი კერპის კარიერა.

1. ჯოდი ფოსტერი

ოსკაროსან ჯოდი ფოსტერს ყველაზე მეტად ბრალდებულსა და კრავთა დუმილში შესრულებული როლებით იცნობენ. თუმცა, ამერიკელი ვარსკვლავის დებიუტი ბევრად ადრე, 1965 წელს შედგა, როცა 3 წლის ჯოდი სატელევიზიო რეკლამაში გადაიღეს. ამასთან, მომდევნო წლებში მან 50-ზე მეტ სერიალში ითამაშა როლი.

2. კრისტიან ბეილი

ბეილი ლამის ყველასთვის ბეტმენია, პირველ რიგში. კარიერის განმავლობაში მან ბევრი დასამახსოვრებელი პერსონაჟი შექმნა, მაგრამ ცოტამ თუ იცის, რომ კრისტიანი მხოლოდ 13 წლის იყო, როცა სტივენ სპილბერგის იმპერიის მზეში გამოჩნდა 1987 წელს.

3. ითენ ჰოუკი

არაერთ გამორჩეულ როლს მოიცავს ითენ ჰოუკის შემოქმედებითი ცხოვრებაც. მაყურებელი ყველაზე მეტად მას Training Day-სა და Boyhood-ში შესრულებული როლებით იცნობს. კარიერაში ყველაზე გარდამტეხ მომენტად ჰოუკისთვის 1989 წლის ფილმში, მკვდარი პოეტების საზოგადოება, განსახიერებული როლი იქცა, თუმცა, მისი დებიუტი ეკრანზე ოთხი წლით ადრე შედგა, როცა 14 წლის მსახიობმა Explorers-ში ითამაშა.

4. ჯეიკ ჯილენჰოლი

ჯეიკ ჯილენჰოლი მაყურებელთა ფართო წრემ 2001 წელს, დონი დარკოში შესრულებული მთავარი როლით გაიცნო. ამ ფილმში იგი თავის დასთან, მეგი ჯილენჰოლთან ერთად მონაწილეობდა.

თუმცა, სანამ საყოველთაო აღიარება მოვიდოდა, მსახიობი ეკრანზე რამდენჯერმე გამოჩნდა. მათ შორის პირველი 1991 წელს, City Slickers-ში ნათამაშები როლი იყო. ამ დროს ჯეიკი სულ რაღაც 11 წლის იყო. მოგვიანებით, 1999 წელს, კინოვარსკვლავი October Sky-შიც გამოჩნდა.

5. ელიზაბეთ მოსი

ამერიკელი მსახიობი მაყურებელთა დიდმა ნაწილმა სერიალ მხევლის წიგნიდან გაიცნო. მოსი მანამდე Mad Men-შიც მონაწილეობდა, მაგრამ ტელევიზორის ეკრანზე რომ პირველად აღმოჩნდა, სულ რაღაც 8 წლის იყო. მაშინ, 1990 წელს, მსახიობმა მინისერიალ Lucky Chances-ში ითამაშა, მოგვიანებით კი სერიალ The West Wing-შიც ასრულებდა როლს.

6. კეტრინ ჰაიგლი

ჰაიგლის კარიერაში ყველაზე წარმატებული პროექტი ალბათ გრეის ანატომია იყო, სადაც ექიმ იზი სტივენსის პერსონაჟს ასახიერებდა. მას შემდეგ იგი რამდენიმე ფილმშიც გამოჩნდა. თუმცა, ეს ყველაფერი ჯერ კიდევ შორეულ მომავალში იყო, როცა 1994 წელს ჟერარ დეპარდიესთან ერთად My Father the Hero-ში ითამაშა. კეტრინი, რომელიც მაშინ 16 წლის იყო, ფილმში დეპარდიეს პერსონაჟის შვილის როლს ასრულებდა.

7. ეშლი ბენსონი

სანამ პოპულარულ სერიალ Pretty Little Liars-ში ჰანა მარინის როლს მოირგებდა, ეშლი ბენსონს ამერიკელი თინეიჯერები უკვე კარგად იცნობდნენ. 1994 წლიდან 1997 წლამდე ბენსონი მოზარდებისთვის განკუთვნილ საპნის ოპერაში, Days of Our Lives-ში თამაშობდა.

8. ნაია რივერა

ნაია რივერამ, რომელიც 2020 წელს გარდაიცვალა, მაყურებლების გული მუსიკალურ კომედიაში, Glee, შესრულებული როლით მოიგო. მაგრამ მანამდე, რივერა მხოლოდ ოთხი წლის იყო, როცა სამსახიობო კარიერა წამოიწყო. 1991 წელს იგი სიტკომში, The Royal Family, გამოჩნდა. ამ დროს მსახიობი იმდენად პატარა იყო, რომ სცენარის დამოუკიდებლად წაკითხვაც კი არ შეეძლო.