მწერლების ბოიკოტის შემდეგ ლიტერას წლევანდელი დაჯილდოების ჩაშლის გამო, საქართველოს პენცენტრმა გადაწყვიტა, სწორედ ამ ლიტერატურული პრემიის მხარდასაჭერად ერთჯერადი კონკურსი გამოცხადდეს, რომელიც "ლიტერას ფორმატს გაიმეორებს, გამოავლენს პრემიის ლაურეატ ავტორებს და დააჯილდოებს მათ".

პენცენტრში აცხადებენ, რომ მათ არ სურთ, დაზარალდეს ლიტერატურული პროცესები და აპირებენ, მწერლებმა დამოუკიდებლად ჩაატარონ მათთვისვე ძვირფასი კონკურსი.

"ლიტერას მხარდამჭერი ერთჯერადი კონკურსის შექმნის მიზანია, მიმდინარე ცენზურის მცდელობით დაზარალებული სამწერლო პროცესის გაძლიერება. ამ პროექტის განხორციელებით გავაძლიერებთ იმ აზრს, რომ ცენზურისადმი დაუმორჩილებლობას და დემოკრატიული პროცესების დაცვას აქვს აზრი. საქართველოს პენცენტრი მწერალთა გაერთიანებაა, რომელიც ამ პროცესს სათავეში ჩაუდგება", — ვკითხულობთ პენცენტრის განცხადებაში.

ფეისბუქზე გამოქვეყნებულ ოფიციალურ ტექსტში აღნიშნულია ის პრობლემებიც, რამაც ლიტერას პრემია წელს ჩიხში შეიყვანა:

"2021 წელს პრემია პირველად დადგა ცენზურისა და გამჭვირვალობის შეზღუდვის საფრთხის წინაშე. კულტურისა და სპორტის ახალმა მინისტრმა პრემიის ჟიურიში თავისი წარმომადგენელი, მინისტრის მრჩეველი მიავლინა. ეს პროცესი მწერლებმა აღიქვეს, როგორც ტოტალიტარულ დროში გამართული კონკურსების ჟიურიში საბჭოთა სამთავრობო "ოდეერის" მივლინება, რომელსაც შეეძლო დაეწუნებინა პარტიულ სულისკვეთებასთან შეუსაბამო ტექსტები".

აქვე იხილეთ განცხადება სრულად:

იმისათვის, რომ პენცენტრმა აღნიშნული პროექტის განხორციელება შეძლოს, დამატებითი ფინანსური დახმარება სჭირდება, კერძოდ — 24 260 ლარი.

ყველას, ვისაც ქართული ლიტერატურის მხარდაჭერა სურს, შეუძლია ნებისმიერი ოდენობის თანხა შემდეგ საბანკო ანგარიშზე ჩარიცხოს:

ეროვნულ ვალუტაში:
მიმღების ბანკი ს.ს "თიბისი ბანკი"
ბანკის კოდი: TBCBGE22
მიმღების ანგარიში GE96TB7365036080100001
მიმღების სახელი ააიპ საქართველოს პენ-ცენტრი

უცხოურ ვალუტაში:
Beneficiary’s Bank JSC TBC Bank
Tbilisi, Georgia
Ben’s IBAN GE43TB7365036180100001
Name of Beneficiary GEORGIAN PEN-CENTRE NCLP

2015 წლიდან ლიტერატურული პრემია ლიტერა ტრადიციულად კულტურის, სპორტისა და ახალგაზრდობის სამინისტროს მიერ ფინანსდებოდა სამინისტროს მიერ დამტკიცებული პროგრამის "კულტურის ხელშეწყობა" ფარგლებში. წელს კი კონკურსის გაუქმების მიზეზი მწერლების, ლიტერატორებისა და გამომცემლების პროტესტი გახდა, რაც სამინისტროს მხრიდან ჟიურიში წარმომადგენლის, იოსებ ჭუმბურიძის დანიშვნას მოჰყვა.