გრეტა თუნბერგმა მილანში გამართულ Youth4Climate-ის სამიტზე მსოფლიო ლიდერები კიდევ ერთხელ გააკრიტიკა მწვავედ. შვედმა აქტივისტმა კლიმატის კრიზისთან დაკავშირებული დაპირებები გაიხსენა და მათ ნაცვლად რამდენჯერმე გაიმეორა "ბლა-ბლა-ბლა".

ახალგაზრდა გარემოსდამცველმა ბრიტანეთის პრემიერმინისტრ ბორის ჯონსონის განცხადება მოიხმო, რომ "საქმე ძვირადღირებული, პოლიტკორექტული ბაჭიახუტიაობით¹ კი არ კეთდება, არამედ ზრდითა და სამუშაოებით.

"ვფიქრობ, [აშშ-ის] პრეზიდენტმა ძალიან სწორი აქცენტი გააკეთა ამაზე. მწვანე აღმშენებლობის დაწყებით, ამ პანდემიისგან უკეთესის მიღება შეგვიძლია".

სწორედ ამ განცხადებას შეეხო თუნბერგი ირონიულად:

"მწვანე და უკეთესი აღმშენებლობა. ბლა-ბლა-ბლა. მწვანე ეკონომია. ბლა-ბლა-ბლა. ნულოვანი მაჩვენებელი 2050 წლისთვის. ბლა-ბლა-ბლა. მხოლოდ ეს გვესმის ეგრეთ წოდებული ლიდერებისგან. სიტყვები, რომლებიც მქუხარედ ისმის, თუმცა, შესრულებისგან შორსაა. ჩვენს იმედებსა და მისწრაფებებს მათი ცარიელი დაპირებები შეიწირავს".

გაეროს ცნობით, 2030 წლისათვის ნახშირბადის ემისიების 16-პროცენტიანი ზრდაა მოსალოდნელი, ნაცვლად იმისა, რომ განახევრდეს. სწორედ განახევრებაა საჭირო, რათა გლობალური დათბობის საერთაშორისოდ შეჯერებულ მაჩვენებელზე — 1,5°C-ზე — შეკავება შესაძლებელი გახდეს.

2021 წლის გაეროს კლიმატის ცვლილების სამიტი ოქტომბრის მიწურულს, გლაზგოში დაიწყება. მასზე ატმოსფეროს ყველაზე მეტად დამაბინძურებელი ქვეყნები ემისიების შესამცირებლად უფრო მკაცრ რეგულაციებს წარმოადგენენ.

• კლიმატის ცვლილების "წითელი კოდი" კაცობრიობისთვის და 5 ეფექტი, რომელსაც მომავალში ველით

"რასაკვირველია, კონსტრუქციული დიალოგი გვჭირდება, თუმცა, 30 წელი მხოლოდ ბლა-ბლა-ბლას გაიძახიან და ამან სად მიგვიყვანა? ჯერ კიდევ შეგვიძლია, ეს სიტუაცია შემოვატრიალოთ — ეს სრულიად შესაძლებელია", — დასძენს თუნბერგი, — "ამისათვის საჭიროა, დაუყოვნებლივი, რადიკალური ნაბიჯები გადავდგათ ყოველწლიურად ემისიების შესამცირებლად. ჩვენი ლიდერების გამიზნული უმოქმედობა ახლანდელი და მომავალი თაობების ღალატია".

მომავალ თაობაზე საუბრისას კი უნდა აღინიშნოს, რომ კვლევების თანახმად, მსოფლიოს ახალგაზრდების ნახევარს კლიმატის ცვლილებით გამოწვეული შფოთვა აწუხებს, მათი ნაწილი კი შვილის გაჩენაზე უარს სწორედ კლიმატის კრიზისის გამო ამბობს.

კვლევა აგრეთვე ადასტურებს, რომ დღეს დაბადებული ბავშვები "მწვავე სითბური ტალღებისა და კლიმატის კრიზისით გამოწვეული სხვა უბედურებების მსხვერპლები ბევრად უფრო ხშირად ხდებიან, ვიდრე მათი ბაბუები". ეს ასე იქნება მაშინაც, თუკი სახელმწიფოები დასახულ მიზნებს შეასრულებენ.

• 5 რამ, რაზეც კლიმატის ცვლილება საქართველოსა და მსოფლიოში ახდენს გავლენას

გაეროს, გაერთიანებული სამეფოსა და აშშ-ის წარმომადგენლები ამბობენ, რომ ოქტომბრის ბოლოს დაგეგმილი სამიტი უფრო იმის დამტკიცებაა, რომ 1,5°C-იანი ზღვარის შენარჩუნება ჯერ კიდევ შესაძლებელია.

თუნბერგი, რომლის დამოუკიდებელმა გაფიცვამ 2018 წელს მსოფლიო მოძრაობას ჩაუყარა საფუძველი, მილანის სამიტს სხვადასხვა ქვეყნიდან ჩასულ ასობით აქტივისტთან ერთად ესწრება. ღონისძიებას იტალიის მთავრობა მასპინძლობს. მის ფარგლებში ახალგაზრდები განიხილავენ, რა როლი აკისრიათ მათ გარემოს დაცვასთან დაკავშირებულ გამოწვევებთან გამკლავებაში. კონფერენციას საფუძველი 2019 წელს, გაეროს შტაბ-ბინაში გამართულ კლიმატის ახალგაზრდულ სამიტზე ჩაეყარა.

"საუკეთესო ახალგაზრდებს ასეთ შეხვედრებზე მხოლოდ იმიტომ იწვევენ, რომ თავი მოგვაჩვენონ, ვითომ გვისმენენ", — განაცხადა, — "თუმცა, ცხადია, რომ ეს ასე არ არის. ემისიები ისევ იზრდება. მეცნიერება არ ტყუის.

"ძალაუფლების მქონე ადამიანებს ვეღარ მივცემთ ნებას, გადაწყვიტონ რა არის პოლიტიკურად შესაძლებელი. ძალაუფლების მქონე ადამიანებს ვეღარ მივცემთ ნებას, გადაწყვიტონ, რა არის იმედი. იმედი პასიური არაა. იმედი ბლა-ბლა-ბლა არ არის. იმედი სიმართლეა. იმედი მოქმედებას მოითხოვს და იმედი ყოველთვის ხალხისგან მოდის".

¹Bunny-hugging — გარემოს და ცხოველთა უფლებადამცველი აქტივისტების მისამართით გამოყენებადი დამამცირებელი ტერმინი.