შვედი მუსიკოსისა და პროდიუსერის, Avicii-ის 32-ე დაბადების დღის აღსანიშნავად გუგლმა სპეციალური დუდლი შექმნა. ფერადი ანიმაცია, რომლითაც გუგლი 3 წლის წინ გარდაცვლილ ხელოვანს პატივს მიაგებს, 46-ზე მეტ ქვეყანაში ჩანს.

80-წამიანი ანიმაცია, რომელიც მუსიკოსის 2013 წელს გამოშვებული ჰიტით, Wake Me Up-ით არის გაფორმებული, Avicii-ის შემოქმედებაზე, მოგონებებსა და მენტალურ ჯანმრთელობასთან დაკავშირებულ პრობლემებზე მოგვითხრობს. ილუსტრაციების ავტორი მხატვარი ელისა უაინენსია.

"მსოფლიო ჩარტების ლიდერი სიმღერების გამოშვებიდან საერთაშორისო ფესტივალების წამყვან შემსრულებლობამდე — ტიმი ყოველთვის გვემახსოვრება, როგორც EDM-ის ჟანრის ერთ-ერთი პირველი და ყველაზე გავლენიალი ფიგურა", — წერია გუგლის განცხადებაში.

ფოტო: Getty Images

ტიმ ბერგლინგი, სასცენო სახელით Avicii, თანამედროვე ელექტრონული მუსიკის ინდუსტრიაში ერთ-ერთი ყველაზე ცნობილი პროდიუსერი იყო. 22 წლის ასაკში გამოშვებული Levels დღესდღეობით EDM-ის ჟანრის ერთ-ერთ საეტაპო ტრეკად მიიჩნევა.

Avicii-ს წლების განმავლობაში მენტალურ ჯანმრთელობის პრობლემებთან გამკლავებაც უწევდა. 2018 წლის აპრილში იგი 28 წლის ასაკში გარდაიცვალა, რისი მიზეზიც თვითმკვლელობა გახდა. რამდენიმე დღის შემდეგ მუსიკოსის ოჯახმა წერილი გამოაქვეყნა:

"ჩვენი საყვარელი ტიმი მაძიებელი, მყიფე შემოქმედებითი სულის პატრონი იყო, რომელიც ეგზისტენციალურ შეკითხვებზე პასუხების პოვნას ცდილობდა — გულმოდგინე პერფექციონისტი, რომელიც მოგზაურობდა და ბევრს შრომობდა, რის გამოც დიდ სტრესს განიცდიდა. როცა ტურნეების გამართვა დაასრულა, საკუთარი ცხოვრების გაწონასწორება სურდა, რათა ბედნიერი ყოფილიყო და ის ეკეთებინა, რაც ყველაზე მეტად უყვარდა — მუსიკა. იგი ბევრს ფიქრობდა აზრზე, ცხოვრებაზე, ბედნიერებაზე. ტიმი ნამდვილად არ იყო იმ ბიზნესმანქანისთვის შექმნილი, რომელშიც აღმოჩნდა. მგრძნობიარე ბიჭი იყო, რომელსაც თავისი გულშემატკივრები ძალიან უყვარდა, თუმცა ყურადღების ცენტრში ყოფნას გაურბოდა".

აღსანიშნავია, რომ Avicii-ის მშობლებმა ტიმ ბერგლინგის ფონდიც დაარსეს, რომელიც სუიციდის პრევენციის საშუალებებზე ცნობიერების ამაღლებას ემსახურება.