პანდემიით გამოწვეულ სტრესს ყველა თავისებურად უმკლავდება, ჩემი საყვარელი მეთოდი კი სთენდაფების ყურებაა ნეტფლიქსზე. მგონი, ყველა სთენდაფი მაქვს ნანახი, რაც კი განთავსებულია და ზოგიერთი — რამდენჯერმე. მიუხედავად იმისა, რომ ბევრ ადამიანს არ ვიცნობ, ვინც კომედიის ამ ფორმაზეა შეყვარებული, მაინც გადავწყვიტე, ის უამრავი საათი, რომელიც სთენდაფების ყურებაში მაქვს გატარებული, სტატიის ფორმით "გამემართლებინა". სია სუბიექტურია, მაგრამ მაინც ყველას შევეკამათები, ვინც სხვანაირად ფიქრობს.

10. The Honeymoon Stand Up Special: Collection

ცოლ-ქმარი კომიკოსები, ნატაშა ლეგერო და მოშე კაშერი საუბრობენ მშობლად გახდომის შიშზე, ერთმანეთზე, სექსზე, ბავშვობაზე და კიდევ ათას რამეზე. Special-ი სამი ნაწილისგან შედგება: პირველი ნაწილის მთავარი გმირი ნატაშაა, მეორე მოშეს ეთმობა, მესამე კი თითქმის სრულად იმპროვიზაციაა: ისინი ერთად დასცინიან ("აროუსთებენ") ჩვეულებრივ წყვილებს აუდიტორიიდან.

9. Jim Jefferies: Bare

თუ ჯიმ ჯეფრისზე არაფერი გსმენიათ, გამოდით კომედიის "უსაფრთხო" გამოქვაბულიდან და მოემზადეთ, რომ გული გეტკინოთ. ჯიმ ჯეფრისისთვის "არაფერი წმინდა არ არსებობს".

8. James Acaster: Repertoire

ჯეიმს ეკასტერი უზომოდ ჭკვიანი ინგლისელი კომიკოსია, რომელიც არც ერთ სხვა კომიკოსს არ ჰგავს. ოთხი ნაწილისგან შემდგარი კოლექცია ერთი ამოსუნთქვით იყურება და ყველა დეტალს ეტყობა, რამდენი შრომაა ჩადებული მასში.

7. Ali Wong: Baby Cobra

ალი ვონგი ლაპარაკობს სექსზე, ფემინიზმზე, ქორწინებაზე, სტერეოტიპებზე და არც პროვოკაციულ განცხადებებს უშინდება. მთელი მისი სფეშალი ფეხმძიმობას ნამდვილად არ ეთმობა, თუმცა ეს გარემოება ორმაგად სასაცილოს ხდის მის ხუმრობებს.

6. John Mulaney: Kid Gorgeous

რა შეიძლება ითქვას ჯონ მულეინიზე, გარდა იმისა, რომ მასზე ქრაში მაქვს: ის წლების განმავლობაში Saturday Night Live-ის სცენარისტი იყო და Kid Gorgeous-ის გამო ემის მფლობელია. ახმოვანებს Big Mouth-ში ენდრიუ გლაუბერმანს და ისტორიების მოყოლის არაჩვეულებრივი და უნიკალური ფორმა აქვს. მოკლედ, თუ არ გინახავთ — ნახეთ და მადლობა მერე იყოს.

5. Bo Burnham: Inside

Inside ნამდვილი შედევრია პანდემიისას სახლში გატარებული დღეებისა და ღამეების შესახებ. ეს მუსიკალური პროექტი კომიკოსის ტვინში გამოგზაურებთ, შემოგთავაზებთ სოციალურ კომენტარს გეოპოლიტიკის შესახებ, გაგართობთ, აგაღელვებთ და დაგაკომპლექსებთ, რომ თქვენ კარანტინში არაფერი ასეთი ღირებული არ შეგიქმნიათ.

4. Ricky Gervais: Humanity

ფართო საზოგადოება რიკი ჯერვეისს ოქროს გლობუსის წამყვანობისას ნათქვამი მწვავე ხუმრობებით იცნობს, თუმცა ეს მისი გენიის მხოლოდ მცირე ნაწილია. მისი შექმნილია ბრიტანული სიტკომი The Office და სერიალი After Life. როგორც სხვა სთენდაფებში, რიკი ჯერვეისი Humanity-შიც ცდილობს დაამტკიცოს, რომ ხუმრობა აბსოლუტურად ყველა თემაზე შეიძლება.

3. Dave Chappelle: Sticks & Stones

დეივ ჩაპელი ცოცხალი კომიკოსებიდან ალბათ საუკეთესოა და მარტივად დაუდგებოდა გვერდით ჯორჯ კარლინსა და რიჩარდ პრაიორს. Stick & Stones-მა თამამი ხუმრობების გამო კრიტიკოსები გაანაწყენა, თუმცა Rotten Tomatoes-ზე მას მაყურებლების მიერ 99%-იანი შეფასება აქვს.

2. Neal Brennan: 3 Mics

ნილ ბრენანის 3 Mic ფორმის კუთხით ერთ-ერთი ყველაზე უჩვეულო სთენდაფია, რაც კი არსებობს. სცენაზე სამი მიკროფონი დგას და კომიკოსი თითოეულ მათგანს კომედიის სხვადასხვა ფორმის საჩვენებლად იყენებს. ერთ მიკროფონთან ის ერთწინადადებიან ხუმრობებს ამბობს, მეორესთან — ემოციურ საკითხებზე საუბრობს (დეპრესია, ოჯახი, ა.შ), მესამე მიკროფონი კი ტრადიციული სთენდაფისთვისაა განკუთვნილი. გაინტერესებთ, რომელი ფორმატი გამოსდის ბრენანს უკეთესად? სამივე, სამივე ძალიან კარგად გამოსდის.

1. Hannah Gadsby: Nanette

ჰანა გედსბი ამ სთენდაფით მთელ ჟანრს ცვლის და საკუთარ ცხოვრებასა და გამოცდილებას მძლავ ინსტრუმენტად აქცევს. სიმართლე რომ გითხრათ, სიტყვებით შეუძლებელია იმ შთაბეჭდილების აღწერა, რომელსაც Nanette მაყურებელზე ტოვებს. ეს არის ყველაზე გულწრფელი რამ, რასაც კი ნეტფლიქსზე ნახავთ და მასზე ფიქრს კიდევ დიდი ხნის განმავლობაში ვერ შეწყვეტთ.