უეს ანდერსონის ფილმები ჩვენს გაოცებას საოცარი ფერების, საინტერესო პერსონაჟებისა და ისტორიების გარდა, განსაკუთრებული ვარსკვლავური შემადგენლობითაც ახერხებს. გამონაკლისი არც რეჟისორის ახალი ფილმია, რომელსაც უეს ანდერსონი ესპანეთში იღებს.

უეს ანდერსონის ახალ ფილმში ჰოლივუდის ორ გამორჩეულ სახეს — სკარლეტ იოჰანსონს და მარგო რობის ვიხილავთ. ისინი ტომ ჰენკსს, ბილ მარის, ტილდა სუინტონსა და ედრიენ ბროუდის შეუერთდებიან. ეს ჩამონათვალი უკვე საკმარისია იმის მისახვედრად, რომ წინ შესანიშნავი სანახაობა გველის.

სკარლეტ იოჰანსონს უეს ანდერსონთან მუშაობის გამოცდილება უკვე აქვს, თუმცა — არა კამერის წინ. იოჰანსონი ანიმაციურ ფილმში The Isle of Dogs ერთ-ერთ პერსონაჟს ახმოვანებდა.

სკარლეტ იოჰანსონს მრავალფეროვანი ფილმოგრაფია და ოსკარის ორი ნომინაცია აქვს ფილმებისთვის Marriage Story და Jojo Rabbit. მის აქტიურ კარიერაში ბოლო ფილმი The Black Widow-ია, რომელიც მსახიობსა და დისნეის შორის სამართლებრივი დავის საფუძველიც გახდა.

რაც შეეხება მარგო რობის, მსახიობს მაყურებლები ჰარლი ქუინის პერსონაჟით, აგრეთვე, ფილმებით I, Tonya, Once Upon a Time in Hollywood, The Wolf of Wall Street და Bombshell იცნობენ. აღსანიშნავია, რომ მსახიობი რეჟისორ გრეტა გერვიგის ახალ ფილმში Barbie მთავარ როლს შეასრულებს.

ჯერჯერობით ამ ფილმის არც სათაური და არც სხვა დეტალები ცნობილი არ არის: რეჟისორმა განაცხადა, რომ ამაზე საუბარი ჯერ არ სურს. ვიცით ის, რომ გადაღებები თავდაპირველად რომში იყო დაგეგმილი, თუმცა შემდეგ ესპანეთში გადაინაცვლა — გადასაღებ მოედანზე მუშაობა სექტემბერში დაიწყება.

ამავე თემაზე: