ხშირად ამბობენ, რომ ახალი ამბები ერთი დღე გრძელდება და შემდეგ მას ყველა ივიწყებს, თუმცა კრიშტიანუ რონალდუს და კოკა-კოლას დაპირისპირება ის გამონაკლისია, რომელზეც უკვე რამდენიმე დღეა საუბრობენ.

თუკი რაიმე საოცარი მიზეზით ჯერ კიდევ არ იცით, კრიშტიანუ რონალდუმ პრესკონფერენციაზე კოკა-კოლა წყლით ჩაანაცვლა, რის შედეგადაც კომპანიის აქციების ფასი რამდენიმე მილიარდით გააუფასურა.

ისტორია აქ არ დასრულებულა და ეს დაპირისპირება დღითიდღე უფრო უცნაური და სახალისოც კი ხდება.

ამჯერად მასში უკრაინელი ფეხბურთელი ანდრეი იარმოლენკო ჩაერთო. უკრაინა-ჩრდილოეთ მაკედოინიის თამაშის შემდეგ, რომელიც უკრაინელების გამარჯვებით დასრულდა, იარმოლენკო პრესკონფერენციას დაესწრო.

ფოტო: Getty Images

მან თამაშში 2 გოლი გაიტანა და მატჩის საუკეთესო ფეხბურთელადაც დასახელდა. პრესკონფერენციის დროს მის წინ კოკა-კოლას და ჰეინეკენის ბოთლები ოდნავ მოშორებით იდგა. ჟურნალისტებთან საუბრის დასრულების შემდეგ ფეხბურთელმა ბოთლები თავისთან უფრო ახლოს გადმოდგა და თქვა: "შემიძლია ეს გავაკეთო? ვნახე რონალდუ როგორც მოიქცა, მე კი მათ უფრო ახლოს გადმოვდგამ, კოკა-კოლა და ჰეინეკენ, შემეხმიანეთ".

ამ შემთხვევის ვიდეო შეგიძლიათ ტვიტერზეც ნახოთ, ძნელია მან არ გაგამხიარულოთ.

გარდა იმის, რომ იარმოლენკო თანამედროვე უკრაინული ფეხბურთის ერთ-ერთ საუკეთესო მოთამაშედ ითვლება, არ გაგიკვირდეთ, თუკი კოკა-კოლა და ჰაინეკენი მას სწორედ ამ ხუმრობის შემდეგ დაუკავშირდებიან.

ჩვენ კი ისღა დაგვრჩენია დაველოდოთ მოვლენების განვითარებას და გავაგრძელოთ ჩვენი საყვარელი გუნდის გულშემატკივრობა. აშკარაა, Euro 2020 მოულოდნელობებითაა სავსე.

ასევე იხილეთ: