თუ ყოველთვის გინდოდა აკაკი წერეთლის წაკითხული განთიადის, ან გიორგი ლეონიძის ყივჩაღის პაემნის მოსმენა, ამ შაბათს, 12 ივნისს არაფერი დაგეგმო. შაბათს, 19:00-ზე, წინამძღვრიშვილის #102-ში თბილისი - წიგნის მსოფლიო დედაქალაქის ფარგლებში აუდიო-მუსიკალური საღამო ციფრული ტაეპი გაიმართება.

ზაფხულის ამ საღამოს მოისმენთ აკაკი წერეთლის განთიადს, პაოლო იაშვილის მაგიდა ჩემი პარნასს, გიორგი ლეონიძის ყივჩაღის პაემანს, ზურაბ რთველიაშვილის მე ვარ ვენახსა და იოსებ გრიშაშვილის გამოთხოვება ძველ თბილისთან და აპრილი თბილისში აუდიოჩანაწერებს.

ღონისძიებაზე დასწრება თავისუფალია. მისი მიზანია, აწმყოს მოასმენინონს თბილისის წარსულის ხმები, რომელთა ექოც არასდროს დაიკარგება.

"კვლავ გაივსება თბილისის ერთ-ერთი ეზო და, მათი პოეზია, ღია ფანჯრებიდან, ბინებშიც შეაღწევს. ცოცხალ მუსიკასთან ერთად კი, ეს ყველაფერი, იმ მძლავრ ენერგიას შექმნის, რომელიც დროებით მაინც დაგვაბრუნებს ამ პოეტების ეპოქაში", — წერენ ორგანიზატორები ღონისძიების ფეისბუქგვერდზე.

წარმოდგენა საქართველოს აუდიოფონდში დაცული ქართველი პოეტების ხმის უნიკალური ჩანაწერებისა და სპეციალურად ამ ღონისძიებისთვის შექმნილი მუსიკის ნაერთია. საღამოს მოდერაციას რატი ამაღლობელი და შოთა იათაშვილი გაუწევენ, წარმოდგენაში მონაწილეობას მიიღებს პოეტი დათო ჩიხლაძე, ხოლო მუსიკალურად გააფორმებს ბენ ვილერის, სანდრო ჩინჩალაძისა და ვაჟა მარის ბენდი.

თბილისი - წიგნის მსოფლიო დედაქალაქი UNESCO-ს პროექტია. ამ სტატუსს თბილისი 2021 წელს ატარებს. წაიკითხეთ, რას უნდა ველოდოთ წლის განმავლობაში.