ცნობილი ჩოგბურთელი და მსოფლიოში ყველაზე მაღალანაზღაურებადი ქალი სპორტსმენი, ნაომი ოსაკა მენტალური ჯანმრთელობის გაუარესების გამო საფრანგეთის ღია პირველობას გამოეთიშა.

23 წლის ოსაკა, რომელმაც პირველი მატჩი მოიგო პატრიცია მარია ტიგთან, მეორე ტურში ანა ბოგდანს უნდა შეხვედროდა. თუმცა, გასულ კვირასი მან განაცხადა, რომ საფრანგეთის ჩემპიონატის დროს მედია ვალდებულებების შესრულება არ სურდა, რადგან პრესასთან ურთიერთობა მის ფსიქიკურ ჯანმრთელობაზე ცუდად მოქმედებდა.

მას შემდეგ რაც სპორტსმენმა პრესკონფერენციების გამართვაზე უარი განაცხადა, ის $15 000-ით დააჯარიმეს. რასაც ოსაკას მხრიდან ახალი განცხადება მოჰყვა. ის ამბობს, რომ ტურნირის გაგრძელებას არ აპირებს და სურს მენტალურ ჯანმრთელობას მეტი დრო დაუთმოს.

ფოტო: getty images

ოსაკა აცხადებს, რომ მისი შერჩეული დრო, ამ პრობლემაზე სასაუბროდ, ჩემპიონატისთვის სასიკეთო არ იყო.

ცხადია, ფსიქიკურ ჯანმრთელობაზე სალაპარაკოდ ცუდი დრო არ არსებობს, თუმცა ოსაკა დასძენს, რომ ამ კონტექსტში არ სურს ამ პრობლემის გაუბრალოება:

"ვერასდროს წარმოვიდგენდი, რომ მსგავს სიტუაციაში აღმოვჩნდებოდი. ვფიქრობ, რომ ახლა ტურნირისთვის, სხვა მოთამაშეებისთვის და ჩემი კეთილდღეობისთვის უკეთესი იქნება, თუკი მე გამოვეთიშები ჩემპიონატს და ყველას საშუალება ექნება პარიზში მიმდინარე ტურნირზე ფოკუსირდეს".

"არასდროს მსურდა ტურნირიდან ყურადღების გადატანა, შეიძლება დროც იდეალურადაც ვერ შევარჩიე და ჩემი გზავნილიც უფრო ზუსტი უნდა ყოფილიყო, მაგრამ რაც ყველაზე მნიშვნელოვანია ტერმინს მენტალური ჯანმრთელობა ზედაპირულად არასდროს ვიყენებ".

"სიმართლე ისაა, რომ დეპრესიით 2018 წელს აშშ-ს ღია პირველობის მოგების შემდეგ ვიტანჯები და ამ მდგომარეობასთან გამკლავება ძალიან მიჭირს", — აცხადებს ნაომი.

2018 წელს აშშ-ს ღია პირველობის ფინალურ სესიაში ოსაკამ ცნობილი ჩოგბურთელი სერენა ვილიამსი დაამარცხა. ფინალური თამაში ძალიან ემოციური და დაძაბული აღმოჩნდა. სერენა უილიამსი მატჩის დროს წესების სამჯერ დარღვევისთვის $17 000 დააჯარიმეს. ტურნირის გადამწყვეტი შეხვედრა ნაომი ოსაკას გამარჯვებით 6:2, 6:4 დასრულდა. მატჩი საათი და 19 წუთი მიმდინარეობდა. იმ დროისთვის 20 წლის ოსაკა გახდა პირველი იაპონელი ჩოგბურთელი, რომელმაც დიდი სლემის ტურნირზე გამარჯვება მოიპოვა.

ნაომი ოსაკა და სერენა უილიამსის მატჩი კანადაში.

ფოტო: Warren Toda/EPA, via Shutterstock

ერთ-ერთი პრესკონფერენციის დროს, უილიამსმა პრესასთან გამკლავების საკუთარ სტრატეგიაზე ისაუბრა: "მე ვიცი, რომ ნებისმიერი ადამიანი, რომელიც კითხვას მისვამს, ვერასდროს ითამაშებს იმაზე უკეთ, ვიდრე მე ვთამაშობ, მე სწორედ ასე გიმკლავდებით ჟურნალისტებს, თუმცა ყველა ადამიანს საკუთარი სტრატეგია აქვს".

ნაომი ოსაკას ტურნირიდან გამოთიშვას, სოციალურ ქსელში დიდი გამოხმაურება მოჰყვა. მას მხარდაჭერა სხვადასხვა სპორტსმენმა და ბრენდმა გამოუცხადა.

"ჩვენ მხარს ვუჭერთ ნაომის და ვაფასებთ მის გამბედაობას, რადგან იგი მენტალურ ჯანმრთელობაზე ღიად საუბრობს", — ნათქვამია Nike-ს განცხადებაში.

ოლიმპიურმა ჩემპიონმა ცურვაში, მაიკლ ფელპსმა, განაცხადა: "ძალიან ბედნიერი ვიყავი, როცა მისი გზავნილი წავიკითხე, რადგან ის ძალიან გულწრფელია და მის ისეთ მხარეს აჩვენებს, რომელიც ჯერ არ გვინახავს. ეს გარდამტეხი მომენტი იქნება მენტალური ჯანმრთელობის აღქმაში". მაიკლ ფელპსი უკვე დიდი ხანია ღიად საუბრობს ფსიქიკურ ჯანმრთელობაზე და საკუთარ მენტალურ მდგომარეობაზე. იგი წლებია დეპრესიას ებრძვის.

ოლიმპიურმა ჩემპიონმა ცურვაში — მაიკლ ფელპსი

ფოტო: Olivier Douliery–AFP/Getty Images

ნაომი ოსაკას გულშემატკივრები კი საფრანგეთის ღია პირველობას ბოიკოტსაც გეგმავენ, რადგან მათი განცხადებით, სწორედ ოსაკაა ყველაზე საინტერესო სპორტსმენი, რომლის ყურებაც ნამდვილად ღირს ამ ტურნირზე.

ოსაკას განცხადების შემდეგ საფრანგეთის ჩოგბურთის ფედერაციის პრეზიდენტი ჟილ მორეტონმა პრესკონფერენცია გამართა, სადაც განაცხადა, რომ გულდასაწყვეტია სპორტსმენიც გამოთიშვა და მას სწრაფი გამოჯანმრთელება უსურვა. მორეტონმა პრესკონფერენცია ისე დატოვა, რომ ჟურნალისტების კითხვებისთვის არ უპასუხია.